CEBU, Philippines - Giihaw sa Cebu Institute of Technology-University (CIT-U) Wildkittens ang mangtas Cebu Eastern College (CEC) Dragons, 69-63 aron sakmiton ang ikatulong puwesto sa juniors division sa 12th Cebu Schools Athletic Foundation, Inc. (CESAFI) kagabii didto sa Cebu Coliseum.
Human magtabla, 45-all sa third period pinaagi sa buzzer-beater basket ni Mark Kong, kalit lang mipauwan og nuybe puntos ang Wildkittens pinaagi sa singko ni Charles Singson ug tagduha ka puntos gikan nilang Kressner Jabines ug Marl Vincent Laguna aron miposte’g 54-45 nga abante.
Mipaduol unta ang Dragons, 60-64 sa katapusang minuto sa duwa, apan si Jabines mibuhi og three-pointer sa nahabiling 35 segundos nga maoy nakaluwas sa Wildkittens.
Ang Wildkittens kanunay'ng naggukod sa unang duha ka kuwarter ug diha na nila mailog ang bentaha sa halftime, 30-29 human sa buzzer-beater basket ni Kong.
Dali hinuong nailog sa Dragons ang abante pinaagi ni Manuel Grijaldo ug mitubo ang ilang labaw ngadto sa sayes puntos, 36-30 sa tunga-tungang bahin sa third period. Apan hinay-hinay sab nga nahilis ang labaw hangtod nga nakatabla ang Wildkittens, 45-all kortesiya ni Kong paghuman sa third quarter.
Si Kong nga nabalikan sa iyang maayong pulso sa final period maoy nangulo sa Wildkittens nga miposa og 18 puntos, gisundan ni Jabines nga adunay 16 puntos. Silang Singson ug Carl Anthony Patindol mihungit og 11 puntos matag usa sa maong kadaugan.
Ang naparot nga Dragons gipangulohan nilang Edmundo Bayhonan ug Grijaldo sa ilang 13 puntos matag usa, samtang si Michael Lorenzo Balankig miabuno og 11 puntos.
PUNTOS MATAG USA
CIT-U (69) - Kong 18, Jabines 13, Singson 11, Patindol 11, Laguna 3, Empleo 3, Aloto 2, Alinsub 2
CEC (63) - Grijaldo 13, Bayhonan 13, Balankig 11, Bracero 8, Zosa 4, Yap 4, Mangyao 3, Berdera 3, Alvizo 2, Moral 2 (BANAT SPORTS)