Wildkittens nakauna

CEBU, Philippines - Mitungas una og pito ka bungtod ang Cebu Institute of Technology-University (CIT-U) Wildkittens sa wala pa sila makaipsot sa Cebu Eastern College (CEC) Dragons, 81-78 sa Game-1 sa ilang best-of-three series alang sa ikatulong puwesto sa juniors division sa 12th Cebu Schools Athletic Foundation Inc. (CESAFI) kagabii didto sa Cebu Coliseum.

Ning pagsuwat, nagduwa pa ang natagak nga defending champion University of Cebu (UC) Webmasters batok sa University of San Jose-Recoletos (USJ-R) Jaguars sa ilang kaugalingong best-of-three series alang sa ikatulong dapit sa seniors division.

Naglabaw unta og siyete puntos ang Wildkittens, 76-69 sa kapin sa dos minutos ang nahabilin sa final period human sa three-point play ni Charles Patindol, apan hinay-hinay mikamang ang Dragons ug nakasikit kini, 76-78 sa split charities ni Alfons Alvizo sa katapusang 48.7 segundos sa duwa.

Ang basket ni Joseph Laguna ug usa ka free throw ni Mark Kong maoy nagselyado sa kadaugan sa Wildkittens.

Si Patindol maoy nangu sa Wildkittens sa iyang 16 puntos, samtang si Kong midugang og 13 puntos. Ang pilderong Dragons gipangulohan ni Alvizo sa iyang 25 puntos.

Puntos matag usa

CIT-U (81) - Patindol 16, Kong 13, Nebril 11, Ebona 10, Abines 9, Laguna 8, Alinsub 8, Singson 6

CEC (78) - Alvizo 25, Balanakig 13, Grialdo 9, Berdera 8, Bracero 5, Zosa 4, Bayhonan 2, Sabroso 2, Bacho 2, Moral 2 (BANAT NEWS)