MANILA, Philippines - Kagaya ng iba pang koponan, hangad rin ng San Mig Coffee, dating B-Meg, na makamit ang unang korona sa darating na 38th PBA season na magsisimula sa Setyembre 30 sa Smart Araneta Coliseum.
“Lahat naman ng team na lumalahok sa alinmang torneo ay naghahangad na manalo ng kampeonato. Hindi kami naiiba,” pahayag ni team manager Alvin Patrimonio.
Ang Llamados, makikilala na ngayon bilang Coffee Mixers, ang nagkampeon sa nakaraang PBA Commissioner’s Cup na tinampukan ni import Denzel Bowles.
Sa kabila ng pagiging No. 1 team sa elimination round ng nakaraang Philippine at Governor’s Cup, nabigo pa ring makapasok ang San Mig Coffee sa finals makaraang sibakin ng Powerade at Barangay Ginebra, ayon sa pagkakasunod.
“That would be a tall order for coach Tim Cone,” pahayag naman ni PBA Board representative Rene Pardo.
Maglalaro ang Coffee Mixers ni Cone na may intact na line-up.
Nakakuha rin ang Coffee Mixers ng dalawa pang matataas na players sa rookie draft.
Ito ay ang 6-foot-7 na si Aldrech Ramos at ang 6’5 na si Jewel Ponferrada.