Pagara, Tampus magbinukbukay sa Balamban

CEBU, Philippines - Mag-atubang na sab og lain nga pagsuway si undefeated ALA bantamweight prospect Albert Pagara (12-0, 9KOs) kay iyang sangkaon ang beteranong si Marvin Tampus (27-15, 18KOs) sa main event sa "Bakbakan sa Balamban" fight card sa September 28 didto sa Mayor Exasperanza Binghay sa Balamban, Cebu.

Gawas sa Pagara-Tampus fight, masaksihan usab sa mga boxing fans ang usa ka special exhibition bout tali sa duha ka ALA Boxing Gym lightweight stars nga sila si Jason 'El Niño' Pagara ug Jimrex 'Executioner' Jaca.

Kini ang ikaupat nga sangka ni Pagara karong tuiga, ang labing uwahi mao ang impresibo niyang kadaugan pinaagi sa "unanimous decision" batok ni Alvin Makiling sa undercard sa Pinoy Pride XV didto sa Waterfront Cebu City Hotel and Casino sa miaging bulan.

Sa supporting bouts, si Mharjhun Macahilig (15-2, 9KOs) makigharong ni Gerpaul TI Yamagata Valero (11-13, 7KOs), samtang si Mark Bernaldez (6-0, 4KOs) makigbinukbukay ni Ranie Pamatian (6-12, 1KO).

Mokompleto sa fight card nga gipasiugdahan sa ALA Promotions ug West Cebu Industrial Park Association mao ang sangka nila ni Roma Rate batok Sherwin Caday, Crispin Parba batok Jeffrey Segara ug crowd favorite Jojo ‘Flash’ Intor batok Johnrey Lontiong. (BANAT SPORTS)