CEBU, Philippines - Paningkamotan sa topseed University of the Visayas (UV) Green Lancers nga ilang mapilde ang Southwestern University (SWU) Cobras sa ilang krusyal nga duwa aron seguradong makakuha og luna sa finals sa pagpadayon sa 12th Cebu Schools Athletic Foundation Inc. (CESAFI) karong gabii diha sa Cebu Coliseum.
Buot sa UV Green Lancers nga masegundahan ang ilang 95-86 nga kadaugan batok sa Cobras dihang magsangka sila pag-usab sa alas-6:15 sa gabii human sa laing duwa sa collegiate tali sa defending champion University of Cebu (UC) Webmasters ug University of San Jose-Recoletos (USJ-R) Jaguars.
Kinahanglan nga modaog ang UC Webmasters batok sa USJ-R Jaguars kay kun mapilde, mapalagpot sila sa ilang trono.
Ang UV Green Lancers ni coach Felix 'Donbel' Belano Jr. magsandig sa ilang 6-foot-7 Nigerian recruit Steve Cedrick Akomo uban sa laing higante nga sila si Hernal 'Wowie' Escocio, Rene Jun Saycon, Andrew Avillanoza, Chris Perolino ug Rhaffy Octobre.
Maghangad usab ang UV Green Lancers nilang Phil Mercader, Jerome Silva ug Eman Calo nga nagtinguha mobalik sulod sa finals human gipalayas sa miaging tuig.
Sa laing bahin, ang SWU Cobras magsandig usab sa ilang Cameroonian twin towers nga sila Justin Aboude ug Benoit M'bala uban nilang Bernie Bregondo, Jestoni Casquejo ug Monbert Arong, kinsa miburak og 38 puntos atol sa ilang 97-86 nga kadaugan batok sa USJ-R Jaguars niadtong Huwebes.
Sa pasiunang duwa nga gitakda sa ala-1 sa hapon, ang UV Baby Lancers makigsangka batok sa Cebu Eastern College (CEC) Dragons. Sundan kini sa laing duwa sa juniors division tali sa Sacred Heart School-Ateneo de Cebu (SHS-AdC) Magis Eagles ug Cebu Institute of Technology-University (CIT-U) Wildkittens sa alas-2:45 sa hapon. (BANAT SPORTS)