Mga VIGBA derby gipaabot nga alegre

Gipakalitan ako'g tawag ni sports anchor ug CCTN tv host Bobby Inoferio kinsa mao sab ang presidente sa SCOOP-Cebu Chapter nga patambungon ako sa forum sa mga lokal sabungero nga mga sakop sa Visayas Gamefowl Breeders Association kon VIGBA ubos sa ilang presidente nga si Atty. Louie Arma niadtong Huwebes sa udto.

Tuod man bisan og dili ako sugarol og manok, malingaw gyud ako'g sabung ilabi na sa didto pa ako magpuyo sa Camotes kay daghan sa akong paryente ang nagbuhi og hinigtang manok para sabung.

Alegre ang maong forum ug personal nakong napangutana kung wala pa ba sila makasugat karon og protesta gikan sa People for Equal Treatment of Animals (PETA) kalabot sa Animal Welfare Act kay matag sulod sa manok sa ruydahan aduna gyu'y mabihag-patay ang usa ug buhi ang usa. Tagsa ra kaayong mahitabo nga dunay tabla nga buhi ang duha or patay sab ang duha.

Makalingaw ang nahimong diskusyon ilabi na kay mga gwatsinanggo kaayo ang mga opisyales sa VIGBA nga gipangulohan ni Atty. Louie Arma. Ang ubang mga sakop sa VIGBA board nagkanayon nga usahay magselos ang ilang mga asawa kay unahon kunog hapuhap ang ilang mga hinigtan unya pa gyud mas lami pa og pagkaon kay kanunay dunay vitamins.

Sa higayon nga maka-jackpot sab sila sa sabung, adto sab nila ibundak tanang kwarta sa shoulder bag sa ilang mga kumander.

Matod pa ni Atty. Arma ug iyang mga ginsakopan, adunay mga birtud kining mga sabungero nga dili makita sa ubang tawo ug usa na niini ang ilang "sportsmanship" tungod kay dili sila masuko kung mapilde o dili mga "hard losers."

Gawas pa gyud niini, ang mga sabungero matod pa ni Atty. Arma kanunay nagbaton og "honesty" o pagmatinud-anon. Suwayi kuno'g gara-gara didto sa buwangan dili ba dila ra'y way labud nimo ilabi na gyud kung imong isibat ang pusta o sa linggwahi sa buwangan "pago."

Apan didto gyud ako malingaw ug nahimuot og maayo dihang nagsinukliay kami'g mga panahom kung unsa man gyud nga kategoriya atong ibutang sa pamaantalaan kining "sabung" o derby? Adto ba sa sports page o sa entertainment page?

Nakapangutana ako niini tungd kay kanhi gud, aduna may mga column kalabot sa derby nga migawas sa mga sports pages ug takwahaw man lang kining nangapapas. Sa among bahin isip mga sportswriters, hinay-hinay kaming nakumbensi nga kini diay'ng sabung usa gyud ka matang sa sports kay kana lang mapilde ka ug dili ka magpadala sa imong gibati, nagtangag kanang pulong nga "SPORTSMANSHIP". Mas delikado pa gani sa basketball ilabi na diha sa CESAFI kay kung dili ang mga players maoy magpa-badlung, ang mga coaches gyud maoy magpakita og dili maayong ehemplo apan panagsa lang hinoon kining mahitabo.

Ang among rason nga ang sports naglambigit og "human factor" ilabi na sa pakusog, paabtikay o paspasay makita sab kuno sa sabung. Ang kana lang pag-amuma sa manok mas grabe ug mas lawom pa kana'g personal involvement kay ang uban gani buwagan na lang sa asawa tungod sa ka-pinangga sa manok. Diha sa basketbolan, duna ba'y banga nga player o banga nga coach nga gibuwagan sa asawa? Wala man tingali ug wala pa sab ako makadungog niana nga balitaa.

Nakahinumdom sab ako kaniadto dihang gipadad-an ako og usa ka tibuok kopya sa Seattle Times newspaper gikan mismo sa Seattle, Washignton diin dugay nang nagpuyo ang akong tiya nga si Mrs. Adelina G. Domingo nga usa ka retired bank teller didto ug suod kong ig-agaw nga si Mr. Rogelio Pono nga usa ka insurance executive.Sa maong pamantalaan, dapit mo-duha ka dangaw ang gipatik mahitungod lang gyud sa sabung ug kung buot hunahuna-on, mas mahiligon pa sa sabong ang mga Kano kay kanato ilabi kanang ubang breed sa manok nga atong gigalam ilabi na kanang mga "sweater" didto kana gikan sa Alabama, USA.

Agi'g suporta, atong ipahibalo dinhe ning maong lindog nga adunay mga derby nga gikatakda ang VIGBA sugod karong buwana hangtod na sa Nobiyembre.

Adunay 5-stag derby didto sa Sagay (Negros Occidental) cockpit karong Septiyembre 20-21, sa barangay Tejero cockpit karong petsa 25-26, 4-cock stag derby sa Sagaay unya sa Oktubre 4-5, 4-cock stag derby sa Tejero sa Oktubre 18-19, ug 3-cock stag derby sa Tejero sa Nobiyembre 8-10.

Kinsa kadtong gustong mosalmot sa derby mahimong mo-text ug motawag kang Dr. Lumapas sa 0917-6241-444.

MISCELLANEOUS. My daughter Nicole is turning 17 years old today which is also the feast of San Nicolas de Tolentino parish in barangay Sawang Calero.