CEBU, Philippines - Wala'y nakapiog kang Henric Dawn Ochea sa ilawom aron maoy mangu sa North All-Star ngadto sa ilang 87-77 nga kadaugan batok sa South All-Star nga gipangulohan sa reigning juniors MVP nga si Andres Paul Desiderio sa ipahigayong Cebu Schools Athletic Foundation, Inc. (CESAFI) All-Star Game didto sa Cebu Coliseum.
Ang All-Star diin nagbagat sab ang CESAFI selection nga gipangulohan nilang 6'7" Steve Cedrick Akomo sa University of the Visayas (UV) Green Lancers ug ang 6'6" nga si Justin Aboude sa Southwestern University (SWU) Cobras batok ni June Mar Fajardo ug ang iyang PBA Team nga Petron Blaze Boosters ni coach Olsen Racela.
Kini maoy nagsilbing lamas sa dili pa sugdan ang semifinal round ugmang adlawa diin magbagat ang top four team nga mopailawom sa single round robin series. Ning pagsuwat sa alas 5 sa hapon, padayon pa ang nahisgotang duwa.
Unang magsangka ugma ang no. 1 seed sa high school ang Sacred Heart School-Ateneo de Cebu (SHS-AdC) Magis Eagles nga gipangulohan sab ni Ochea batok sa higpit nga karibal ang Cebu Eastern College (CEC) Dragons ug sundan kini sa sangka batok sa no. 1 seed sa collegiate division ang UV Lancers batok sa no. 4 ug defending champion University of Cebu (UC) Webmasters.
Si Ochea maoy nahimong All-Star MVP human siya moposa og 15 puntos ug ang iyang mga kauban sa Magis Eagles nga silang Rendell Thomas Senining ug Miguel Competente parehong mibahug og 11 puntos matag usa. Si Manuel Grijaldo nga gikan sa ilang kaatbang nga Dragons midugang sab og 11 puntos.
Si Desiderio maoy nangu sa South sa iyang 24 puntos apan dili balanse ang ilang scoring kung itandi sa North squad.
Sa laing bahin, ang anak ni UC coach Roel Gomez nga si Arvin Kim Gomez maoy bag-ong kampiyon sa 3-point shootout human iyang gipukan ang defending champion nga si Banjo Capillar sa University of San Jose Recoletos sa finals sa iskor, 15-11 samtang bag-o sab og kampiyon sa slam dunk dihang wala mosalmot si Andrew Avillanoza ug ang iyang teammate sa UV nga si Rene Jun Saycon maoy nahimong kampiyon kinsa mipilde sa lain niyang kauban sa UV nga si Wowie Escocio, Eman Calo ug ni Abulaiz suliman sa USJR.
Puntos matag usa:
North (87)– Ochea 15, Senining 11, Competente 11, Grijaldo 11, Suelto 10, Igna 7, Araw-araw 6, Adlawan 6, Zosa 5, Bulan 4, Balankig 2, Matoas 2, Antigua 2
South (77) – Desiderio 24, Canete 10, Armenion 9, Gahi 9, Dinolan 7, Singson 5, Dela Cerna 4, Kong 4, Laguna 4, Ebona 2, Villarta 2, Gastador 2. (BANAT NEWS)