2nd Lapu-Lapu Health Run series gilusad

CEBU, Philippines - Pormal na nga gilusad ang 2nd Lapu-Lapu City Health Run nga gikatakda sa Septiyembre 29 didto sa Brgy. Punta Engaño sa naasoy'ng dakbayan.

Lahi sa miaging tuig, inay nine stage, gihimo na lang kini og eight stage ang maong series, apan gipatas-an gikan sa 10K ngadto sa 12K ang labing taas nga rota sa lumba.

Gawas sa 12K, laing kategoriya nga mahimong daganan sa mga runners mao ang 2K, 3K, 5K, 4K, 6K, 8K ug 10K.

"After sa successful nga staging last year diin miabot sa 2,000 ang mga mi-participate, we are hoping of a more exciting edisyon this year alang sa mga runners sa Lapu-Lapu," matud pa ni City Councilor Harry Radaza pinaagi sa "video chat" atol sa press conference kagahapon didto sa Lapu-Lapu City Hall.   Si Radaza mibakasyon pa karon didto sa California.

Giklaro hinuon ni Radaza nga bukas usab ang ilang lumba sa mga dili residente sa Lapu-Lapu.

Ang second leg gitakda sa Oktubre 13 didto sa Brgy. Buaya, ang third leg sa Oktubre 20 sa Brgy. Pajac, ang fourth leg sa Olango Island inig Oktubre 27 ug ang fifth leg sa Brgy. Marigondon sa Nobiyembre 3.

Ang sixth leg adto ipahigayon sa Brgy. Kalawisan sa Nobiyembre 10, ang seventh leg sa Brgy. Basak ug ang final leg adto sa Lapu-Lapu City Hall grounds.

Libre ang registration, apan adunay optional fee nga P250 niadtong runners nga gustong makabaton og singlet ug wrist band. Mahimong magparehistro sa mga barangay hall diin ipahigayon ang lumba.  (BANAT)