CEBU, Philippines – Moabot ngadto sa 25 ka koponan gikan sa nagkalain-laing pribadong tunghaan sa dakbayan sa Mandaue City ang gilaumang mosalmot sa 2012 Hoopstars Inter-School 3-on-3 basketball tournament nga buksan sa Septiyembre 8 didto sa J. Centre Mall grounds sa A.S. Fortuna street sa nahisgutang dakbayan.
Gibahin ang torneyo ngadto sa upat ka age-bracket -- 10-under, 12-under, 14-under ug 16-under.
Hinuon, gitug-an ni tournament director Cerwin Eviota nga wala pa makompleto ang lista sa mga koponan nga mosalmot ug mahibaw-an kini atol na sa katapusang adlaw sa registration sa Septiyembre 8.
Sa pagka karon, ang mga tunghaan nga nipadayag sa ilang partisipasyon naglakip sa Springdale School, St. Paul Learning Center, San Isidro Parish School, St. Louis School of Mandaue, Mandaue Christian School, Philippine Christian Gospel School ug Mt. Olives Christian Academy.
Ang mokampiyon sa matag age-bracket makadawat og tropeyo ug medalya matag miyembro.
Gipasiugdahan sa Mandaue City government, ang torneyo gisuportahan usab sa Thirsty ug McDonalds. BANAT SPORTS