CEBU, Philippines – Nagmalampuson ang University of Cebu (UC) ug University of San Carlos-Basic Education (USC-BED) sa pagpanalipod sa ilang tagsa-tagsa ka trono sa 17th Milo Little Olympics-Visayas leg nga bag-o lang natapos niadtong Domingo didto sa Cebu City Sports Center (CCSC).
Dili hinuon sayon ang ilang kadaugan karon itandi sa nangagi nilang kampanya kay nakasugat og lisud nga pagsuway sa wala pa nila maangkon ang ika-17 nilang Milo regional title sa secondary division batok sa USC-BED.
Ang UC mitapos sa kompetisyon uban ang 176.25 puntos, labaw lang og 14.75 puntos sa USC nga maoy second placer nga adunay 161.5 points.
Misalbar sa UC mao ang ilang swimming team nga maoy nakatabang sa ilang paglawig. Ang swimming sensation nga si Michael Ichiro Kong maoy daku'g natampo sa kalampusan sa UC nga mikutlo og walo ka golds, usa ka silver sa individual event.
Mipuwesto sa ikatulong dapit ang University of the Visayas (UV) nga adunay 77.5 puntos, samtang ang Abellana National School (ANS) nga adunay 75.5 puntos ug Ilo-ilo National High School sa ilang 58.25 puntos maoy mihitsas sa top five placers sa secondary division.
Sa laing bahin, ang USC-BED mao usab ang midominar sa elementary division nga mikolekta og 135.25 puntos, gisundan sa UV nga mikolekta og 61.25 puntos, samtang ang Sacred Heart School-Ateneo de Cebu (SHS-AdC) adunay 50.7 points.
Mipahiluna sa ikaupat ang Catmon Elementary School nga mihipos og 35 puntos ug ang Cebu City Central School mikapyot sa ikalima bitbit ang 33.25 points.
Human sa kompetisyon, ang mga atleta sa Visayas leg o "Team Bisdaks" maghugpong na usab alang sa ilang preparasyon sa National Championships nga gikatakda sa Oktubre 19 didto sa Marikina City. BANAT SPORTS