CESAFI quarterfinals ug CESAFI All-Star Game

 CEBU, Philippines - Nag-anam na kainit ang duwa sa nagpadayong 12th season sa Cebu Schools Athletic Foundation ,Inc. (CESAFI) diha sa Cebu Coliseum ug dili ako mahibulong kung ang mga top four seeds kinsa armado'g twice-to-beat incentive mo-abante gilayon sa semifinals.

    Ang UV Lancers kinsa miharus sa ilang elimination round sa 6-0 nga baraha, nakaginhawa na og luag ug nagbinangday na sa ilang quarter mentras magpa-abot kung kinsay ilang ikasangka unya sa Septiyembre 11.

    Ang no. 2 qualifier nga University of San Jose Recoletos (USJR) Jaguars ugma pa sab mosalida batok sa seventh-seed University of Southern Philippines Foundation (USPF) Panthers ug angay hinumdoman sa Jaguars nga dili sila magpasagad kay sa una nilang panagbagat, igo lang silang nakaipsot  og usa ka palito.

    Migawas nga no. 3 seed ang Southwestern University (SWU) Cobras human ilang gipaak didto sa USC gym ang host University of San Carlos (USC)  Warriors niadtong Huwebes sa gabii sa iskor, 98-63 diin ang Warriors mitidlum na lang ngadto sa no. 5 spot ug maoy ilang makontra ang defending champion University of Cebu (UC) Webmasters kinsa maoy nakatungtong sa ikaupat nga pwesto.

    Ang Cobras makigsangka batok sa Cebu Institute of Technology-University (CIT-U) Wildcats nga ila na sab gilubong atol sa elimination. Ang Wildcats ug ang Warriors mao lang ang mga teams nga dagko kaayo sila'g winning margins busa, nakuha gyud nila ang ikatulong pwesto.

    Gawas nga sikit ang no. 4 ug 5 bisan pa sa NBA playoffs, nindot kining duwaa kay gipilde man sa Warriors ang Webmasters sa elimination.

    Sa high school division, ugma pa sab mosalida ang no. 2 qualifier UV Baby Lancers ug maoy ilang kontrahon ang USPF Baby Panthers. Ang Sacred Heart School-Ateneo de Cebu (SHS-AdC) Magis Eagles maoy miguwang topnotcher sa high school division (8-0) human ilang gisanta ang pagmangtas sa Baby Lancers.  

    Ang 3rd seed sa high school mao ang CIT-U Baby Wildcats kinsa mas paborito batok sa no. 6 ang UC Junior Webmasters ug ang no. 4 mao ang USC Baby Warriors kinsa makigtakos batok sa no., 5 nga kanhi champion Cebu Eastern College (CEC) Dragons nga nahimutang karon sa peligro.

    Human sa ilang kampiyonato sa CESAFI juniors division niadtong 2010, wala mo-abante sa finals ang Dragons sa miaging tuig tungod kay gitagak sila sa Magis Eagles sa usa ka kulba-hinam kaayong duwa. Karong tuiga, dili sab kaayo lig-on ang ilang team mao nga nawad-an sila sa twice-to-beat advantage batok sa mas dako nga Baby Warriors kinsa igo lang sab nakagunit sa dunggan human ma-upset sa Baby Wildcats.

CESAFI ALL-STAR GAME. Gi-atangan na karong panahona ang CESAFI All-Star Game karong Septiyembre 9 diin mosalida ang mga pambato sa nagka-lain laing team sa CESAFI ug pito kanila ang gikan sa UV nga mao silang Steve Cedrick Akomo, Wowie Escocio, John Michael Abad, Phil Mercader, Eman Calo,Jerome Silva ug Rene Jun Saycon.

    Ang laing mga players nga molangkub sa CESAFI All-Star mao silang Quinton Brian Heruela sa UC, June Michael Cantonao sa USC, Allan Dimco sa CIT-U, Joseph Sedurifa sa USPF, Benoit Mbala ug Monbert Arong sa SWU, ug Abulaiz Suliman ug Miguel Tabaloc sa USJR.

    Ang mga contestants sa three-point shootout mao silang Silva, Arong, Robinson Mohammad sa UC, Stephen Que sa USC, Banjo Capillar sa USJR, Axel Rabaya sa CIT-U ug Sedurifa sa USPF.

    Panalipdan sab sa defending champion sa slam dunk nga si Andrew Avillanoza ang iyang titulo diin hagiton siya nilang Escocio, Calo, Suliman ug Alexander Asis sa UC.

 Sulngon sila dinhi sa Sugbo sa Petron Blaze, ang team sa PBA nga naglakip kang CESAFI reigning MVP nga si June Mar Fajardo, ang mapasigarbohong produkto sa UC.

    Ang Petron Blaze ubos karon sa bag-ong coach nga si Roderick "Olsen" Racela kinsa mipuli kang coach Ato Agustin.