CEBU, Philippines - Duha ka sakop sa Yaw-Yan ArDigma Cebu Top Team nahiagom og managlahing kapalaran sa ilang tagsa-tagsa ka sangka sa Mindanao Ultimate Mixed Martial Arts (MUMMA)-"The Proving Ground–Warshock" fight card sa miaging gabii didto sa Liceo de Cagayan University Gym sa Cagayan de Oro City.
Ang Cebu-based British MMA fighter nga si Cris Thompson Brooks midaog batok ni heavyweight veteran Gygz Ocampo, apan nasugamak ang iyang teammate nga si Universal Reality Combat Championship (URCC) Visayas pinweight challenger Geronimo Etac ngadto ni Rabin Catalan sa Tricks MMA.
Dili sayon ang kadaugan ni Brooks dihang naigo siya sa makusog nga hook ni Ocampo nga mipasarasay kaniya ibabaw sa ring, apan dali kining nakabawi gamit ang iyang ground fighting.
Milusad og bangis nga ataki si Brooks gamit ang iyang siko ug kumo nga maoy mipaundang ni Ocampo sa first round.
Sa iyang bahin, si Etac nga daku kaayo'g labaw sa striking napilde gihapon kini human siya madakpi og usa ka arm lock ni Catalan nga maoy nakapaaghat sa referee paghunong sa away.
Sama ni Etac, nangapukan usab ang duha ka Cebuano MMA fighters nga sila si Johnjier 'Dangerous' Torbiso sa Durex Dragon nga miyukbo ni Rocky Tune Batolbatol sa MUMMA-Cagayan De Oro’s Rocky Tune Batolbato, samtang si Rambo 'El Cobrador' gituok ni Israel Gomez. - BANAT NEWS