Meta-Fit Camp gitakda sa Sept. 3

CEBU, Philippines - Usa sa labing sikat nga fitness coach nga si Jim Saret mopahigayon og fitness camp nga uloha'g "Coach A Meta-Fit: Metabolic Fitness Camp" sa Septiyembre 3 didto sa Parkmall grounds, Mandaue City.

Sama sa mga nangaging edisyon, ang upat ka semana nga camp nga pangulohan ni Fit-Fil Cebu project director Alan G. Choachuy, misaad og mas daling paagi sa pagpagamay sa timbang gamit ang moderno ug scientific-based nga mga ehersisyo.

Ang mga routines ug circuit training nga gamiton sa maong fitness camp gidesinyo sa sikat nga athletic trainer ug batid sa sports medicine nga si coach Jim Saret, usa sa mga conditioning coach sa Smart Gilas Pilipinas.

Ang training session magsugod sa alas-6 hangtod sa alas-8 sa gabii ug molungtad kini sa Oktubre 6.

Giklaro ni Choachuy nga limitado lang ngadto sa 70 ka mga partisipante ang dawaton sa maong fitness camp aron matagad og maayo ang mga entrante.

Ang registration fee nagkantidad og P1,500. Mahimong magpalista diha sa Persimmon Plus sa Mabolo ug sa RUNNR sa Ayala Active Zone.   - BANAT NEWS