San Andres misalida sa Round 8 sa Keiz BJ Motorcross Series

CEBU, Philippines - Wala palabya ang panahon sa bisitang top rider nga si Kenneth San Andres dihang misalida kini atol sa Round 8 sa 1st Keiz BJ Motors and Phoenix Cyclomax Titan Motocross Series niadtong Domingo didto sa mas gipadak-an nga racetrack sa Brgy. Pagsabungan sa Mandaue City.

Ang taga-Manila nga si San Andres, kinsa maoy ranked No. 3 sa Asian racing circuit, mipakita sa talagsaon niyang katakus aron sakmiton ang titulo sa expert division.

Ang multi-titled nga si Kimboy Pineda sa Davao, mitapos sa ikaduha, samtang si Jerick Mitra mitugpa sa ikatulo. Hinuon, si Mitra mibitbit og championship trophy human siya maghari sa intermediate category batok nilang Jeese Pineda ug Cyril Tariman.

Sama ni Mitra, si Pineda nakabitbit sab og championship trophy human niya gidominar ang novice production batok nilang Salmar Longakit ug Tariman.

Ang mga anak ni race organizer Siegfred Ornopia nga sila si Bryle ug Kenken mikawat sab og salida dihang ilang gidominar ang tagsa-tagsa nila ka lumba.

Dobleng kadaugan ang naangkon sa 12-anyos nga si Brylle. Giharian niya ang 85cc class. Sila si   Peewee Galia ug Gelo Leonardo mi-okupar sa sunod nga duha ka dapit.

Nanghawod sab si Brylle sa beginners selection limited edition pinaagi sa pagpilde sa mas maguwang pa niya nga silang Denmar Supatan ug Jolito Codinera.

Ang manghod ni Brylle nga si Kenken mao usab ang nag-una sa peewee division. Ang ilang manghod nga si Keizer nalandig sa ikatulo sunod ni PJ Galia.

Mipatigbabaw si Peewee Galia sa mini 65 cc class batok nilang Tammy Largosa ug Froilan Mendaros, samtang si Rowel Marano nidaog sa local Pagsabungan competition. Sila si Sarge Espina, Esoy Cuesta, Christian Tagalog ug Jason Batad mikompleto sa top five finishers.

Si Kent Limpag midaog sab og duha ka kampiyonato pinaagi sa local enduro ug habal-habal and wanggits' showdown.

Nag-una usab si Ray Quirol sa beginners open production batok nilang Kent Canape ug Jun Quirol, samtang sila si Russel Gungob ug Butch Flores naghari sa executive A ug B.

Ang usa ka adlaw nga lumba nahimong malampuson ug hapsay pinaagi sa suporta sa Phoenix Petroleum Inc., Congressman Pablo John Garcia, Betonval Ready Concrete, Haojue Philippines, WRW Enterprises, Primo Tires, Motolite, Nelson Sicad, General Sicad, Reynante Tigue, RMO Motorparts ug councilor Renato 'Boy Ornopia.

Gipasalamatan usab ni Keiz BJ Motors big boss Siegfred Ornopia si Engr. Jun Mahusay and family, Brgy. Basak Police Force nga gipangulohan ni Capt. Wilson Abot, Pagsabungan Brgy. Capt. Andres Suson ug councilor Asterio 'Bubbles' Suson tungod sa ilang walay hunong nga pagsuporta aron mahimong mabulokon ug malampuson ang kalihukan.   - BANAT NEWS