Demape suspenso

CEBU, Philippines - Migamit sa ilang gahom ang Cebu Schools Athletic Foundation Inc. (CESAFI) pinaagi ni commissioner Felix 'Boy' O. Tiukinhoy Jr. dihang gisagpa nila ang head coach sa Cebu Institute of Technology-University (CIT-U) Wildcats nga si Gilbert Demape og usa ka duwa nga suspensiyon uban ang P5,000 nga multa tungod sa iyang "unsportsmanlike behavior" atol sa ilang 84-85 kapildihan ngadto sa University of San Jose-Recoletos (USJ-R) Jaguars niadtong Sabado sa gabii didto sa Cebu Coliseum.

Ang CIT-U athletic director nga si Alex de la Torre gipahamtangan sab og usa ka duwa nga suspensiyon.

Atol sa mainitong duwa, si Demape nasuko dihang si referee Reylando 'Ado' Balongoy mitawag og foul ni Frankly Batiquin sa CIT-U batok ni Jason Albedado sa USJ-R sa nahabiling 1.4 segundos sa duwa. Si Olbedado mipasud sa iyang split charities nga igo na kaayo aron baswaton ang Jaguars ngadto sa nipis kaayo nga kadaugan.

Sa iyang handwritten report ngadto sa CESAFI secretariat, nagkanayon si Balongoy nga gawas pa nga gikumprontasi siya ni Demape, masuk-anon sab kining mihagit kaniya og sukmagay didto sa parking lot dihang padulong na unta siyang mopauli.

Didtong tungora diriyot moulbo ang kagubot dihang gidagan ni Demape si Balongoy.

Gipadad-an sab ni Tiukinhoy og laing suwat si CIT-U Athletics Director Alex dela Torre, kinsa suspensuhon sab og usa ka duwa tungod sa iyang pagsuway og sulod sa referee’s dressing room diin didto iyang gikasab-an ang mga referees.

Gidid-an ni Tiukinhoy si Dela Torre pagtambong sa duwa sa Wildcats batok sa University of San Carlos (USC) Warriors karong Septiyembre 1 atol sa katapusang duwa sa elimination round didto sa Cebu Coliseum. 

Si Olbedado mitapos og 12 puntos, apan si Sulaiman maoy topscorer sa USJ-R sa iyang 21 puntos. Si Miguel Tabaloc mitipak og 17 puntos. - BANAT NEWS