Smart Gilas mosalmot sa Stankovic Cup

CEBU, Philippines - Molanat lang og pipila ka adlaw ang pahuway sa Smart Gilas Pilipinas tungod kay laing international tournament na usab ang ilang salmutan nga mao ang Stankovic Cup sa Septiyembre 14 didto sa Tokyo, Japan.

Ang Smart Gilas mihimo og makasaysayanong kalampusan niadtong Domingo dihang nasakmit nila ang kampiyonato sa 34th William Jones Cup didto sa Taiwan diin ilang gipilde ang mas tag-as nga players sa USA selection, 76-75.

Ang bag-o lang naporma nga national team ubos sa giya ni coach Chot Reyes mitapos sa Jones Cup nga maoy labing una nilang international tournament, sa record nga 7-1, gisundan sa 2009 FIBA Asia Champion Iran (6-2) ug US selection (5-3).

Sa iyang bahin, si Smart Gilas coach Chot Reyes wala pa matagbaw sa kalampusan sa koponan ug tinguha niya nga mausban ang nindot nga performance sa national team atol sa Stankovic Cup diin makasangka na usab nila ang mga lig-ong koponan sa Asya.

Gawas nga ang Stankovic Cup mao ang qualifier alang sa 2013 FIBA Asia Championship, daku usab kini nga hagit alang sa Pilipinas tungod kay wala pa sila makakuha og taas nga pwesto sa maong torneyo sugod niadtong 1978.

Moduwa gihapon sa Smart Gilas mao ang bayani sa Jones Cup nga si LA Tenorio, naturalized center Marcus Douthit, Ranidel De Ocampo, Larry Fonacier, Sonny Thoss, Mac Baracael, Jeff Chan, Gabe Norwood, Enrico Villanueva, Gary David, Jay-R Reyes, Sol Mercado, Garvo Lanete ug Fil-American Matthew Rosser.