Heavy Bombers, Altas palalakasin ang kapit sa No. 2

Manila, Philippines -  Magkakaroon ng pag­kakataon ang Jose Rizal University at Perpe­tual Help na ma­kasalo uli sa ika­lawang puwesto kung ma­nanalo sa kanilang hiwa­lay na laro sa 88th NCAA men’s basketball nga­yon sa The Arena sa San Juan City.

May 7-3 karta ang Hea­vy Bombers at Altas kaya’t kung mananalo sa Mapua at Letran ayon sa pagkakasunod ay aangat sila upang pantayan ang pahingang San Sebastian na may 8-3 ba­raha.

Naunsiyami sa huling laro sa kamay ng Arellano, 82-85, inaasahang totodo mu­li ang laro ng tropa ni coach Vergel Meneses laban sa Cardinals sa ganap na alas-4 ng hapon.

Galing din sa kabiguan ang Cardinals sa kamay ng Knights, 60-72, at kaila­ngan nilang manalo para hindi lumayo ang asam na pang-apat na puwesto.

Balikatan naman ang ma­gaganap na tagisan sa pagitan ng Altas at Knights sa alas-6 ng gabi.

Tumibay muli ang laban ng host Knights sa pagbabalik ng 6-foot-7 cen­ter na si Raymond Almazan na lumiban sa huling pitong laro ng koponan.

Tumapos ang manlala­ro na hinirang bilang Most Im­proved Player noong na­karaang season, na may 4 points, 6 assists at 1 block.

“Gusto kong bumalik pa­ra tulungan ang team sa kahit paanong paraan,” wi­ka ni Almazan.