Jaguars nakalihay sa upset

CEBU, Philippines - Tulo una ka sipyat sa free throws ang nahimo sa beteranong shooter nga si Jason Olbedado sa wala pa ang iyang split charities sa nahibiling 1.4 segundos nga maoy nagsalbar sa University of San Jose Recoletos (USJR) Jaguars ngadto sa kulba-hinam nga 85-84 nga kadaugan batok sa Cebu Institute of Technology-University (CIT-U) Wildcats kaniadtong Sabado sa gabii atol sa nagpadayong 12th season sa Cebu Schools Athletic Foundation, Inc. (CESAFI) didto sa Cebu Coliseum.

Gipapas sa Wildcats ang ilang 13 puntos nga biya sa halftime, 27-40 dihang nagmangtas sila sa third period ug human hingpit nilang ma-ilog ang labaw, daw nahimong usa ka chess match ang duwa diin nagpuli-puli og labaw ang duha ka kampo.

Gikan sa third period sikit na kanunay ang duwa ug nag-anam kataas ang intensity sa duwa hangtod nahitabo ang drama sa nahibiling pipila ka segundos.

Naglabaw ang Wildcats, 61-60 pagsugod sa fourth period ug natapos ang duwa nga naglabaw sab og usa ka palito ang Jaguars nga daw dili madawat ni Wildcats' coach Gilbert Demape ang gidangatan sa duwa tungod kay sa iyang tan-aw gidaginot pa gyud ni referee Ado Balongoy ang tawag ngadto kang Franklyn Batiquin batok kang Olbedado nga mahimo man untang ipalabay lang kini o "let-go" situation.

Diriyot magubot sulod sa korte dihang mihamag si coach Demape ngadto kang Balongoy ug iya kining gipangutana kung nganong iya pa man kadtong gitawag?

Ang hukom kung pahamtangan ba og sanction si Demape paaboton pa ni CESAFI commissioner Felix O. Tiukinhoy Jr. pinasikad ang iyang hukom sa pagahimoong "incident report" ni referee Balongoy.

Gani sa tan-aw ni Demape, si Batiquin pa maoy gi-foul ug gidasmagan hinungdan nga milagpot ang bola nga iya na untang na-ilog.

Nagtabla pa ang iskor sa 84-all sa may 9.5 segundos human sa duha ka free throws ni Allan Dimco apan wala mahitabo ang overtime human sa winning free throw ni Olbedado ug niadtong tungora, pareho nang na-foul out silang Abulaiz Suliman ug Renato Abing sa Jaguars nga mao unta'y naghatag og bentaha sa Wildcats kung nahitabo pa ang overtime period.

Mitug-an si coach Demape sa Banat Sports "akong gisiging-siging si Balongoy ug nangutana ko niya nganong iya pa man gyud kadto gihimo ang tawag ug wala e-let go."

Matod pa usab niya nga "my players wanted to win and the crowd wanted a good game. Had it gone to overtime, then I don't know how to define what good game is."

Si Suliman maoy nangu sa Jaguars sa iyang 21 puntos ug si Miguel Tabaloc midugang og 17 puntos samtang mi-iskor ug 14 ug 12 puntos silang Banjo Capilllar ug Olbedado alang sa Jaguars kinsa naghupot na karon og 4-2 nga baraha.

Ang Wildcats kinsa adunay 1-4 nga baraha, gipangulohan ni Dimco sa iyang 25 puntos ug parehong may 13 puntos matag usa silang Axel Rabaya ug Floyd Taboada.

Puntos matag usa:

USJR (Coll.) 85 –   Suliman 21, Tabaloc 17, Capillar 14, Olbedado 12, Abing 9, M. Parker 4, C. Parker 4, Regalado 4

CIT-U (Coll.) 84 –       Dimco 25, Rabaya 13, Taboada 13, Palileo 12, Brigoli 9, Batiquin 6, Taghoy 2, Pono 2

Halftime: 40-27