CEBU, Philippines - Miabot ngadto sa 300 ka mga aspiring chess players sa Kabisay-an ang misalmot sa 2012 Shell National Youth Active Chess Championships-Visayas leg nga gibuksan kagahapon didto sa SM City-Cebu event center.
Giisip nga labing karaang grassroots chess tournament sa nasud, ang Visayas leg sa Shell Chess Championships laraw nga makakaplag og mga batan-ong chess prospects sa juniors ug kiddies open divisions.
Ang Visayas leg mao ang katapusang leg sa nationwide circuit nga nagsugod didto sa Tuguegarao (northern Luzon leg), Batangas (southern Luzon) ug Davao (Mindanao leg).
Ang mga mudaog sa 9-round boy’s event ug 7-round girls categories maoy ipadala ngadto sa grand finals nga gitakda sa Septiyembre 22 didto sa SM Megamall sa Ortigas.
Si tournament director Alex Dinoy nagkanayon nga ang torneyo magpalig-on sa programa sa paghulma og mga bangiitang chess players sa nasud sama sa programa sa Cebu City nga bag-o lang napatik sa Guiness Book of World Records isip world’s “largest board game tournament” niadtong Enero.
Mga atangang players sa torneyo naglakip nila ni Alfer Joseph Fernandez ug chess wizard Allan Pason. Si Fernandez sa University of the Visayas (UV) modepensa sa iyang titulo sa boy’s junior division, samtang si Cebu City Chess Festival grand champion Allan Pason moduwa sa kiddies division. (LPM) - BANAT NEWS