Viloria train sa Wild Card Gym

CEBU, Philippines - Isip kabahin sa iyang pagpangandam sa nagsingabot niyang unification bout, si WBO flyweight king Brian Viloria mag-ensayo ngadto sa nabantog nga boxing gym ni Freddie Roach nga Wild Card Gym sa Los Angeles.

Ang Fil-American champion moaway ni Mexican WBA title-holder Hernan Marquez sa Septiyembre 29 didto sa Home Depot Center sa Carson, California.

Ang 31-anyos nga si Viloria gikan pa sa impresibong ninth round knockout nga kadaugan batok ni Mexican Omar Nino Romero niadtong Marso didto sa Ynares Center.

Si Viloria nagkanayon nga kinahanglan niya nga mag-ensayo sa Wild Card Gym aron makahimo og grabeng preparasyon alang ni Marquez kinsa iyang giisip nga usa sa labing kuyaw niya nga kontra.

Milig-on usab ang training team ni Viloria human usab niya gikuha ang Filipino conditioning trainer nga si Marvin Somodio kinsa mitabang usab sa preparasyon ni Manny Pacquiao niadtong Hunyo. (LPM gikan sa Philboxing) - BANAT NEWS