USJR-CIT-U magpinaakay

CEBU, Philippines - Magpinaakay ug magkinawrasay karong gabii ang University of San Jose Recoletos (USJR) Jaguars ug ang Cebu Institute of Technology-University (CIT-U) Wildcats sa nagpadayong 12th season sa Cebu Schools Athletic Foundation, Inc. (CESAFI) didto sa Cebu Coliseum.

Gikan sa ilang pagkapandol gikan sa mga kamot sa mas paboritong University of the Visayas (UV) Green Lancers, 76-89 niadtong Agosto 18, maoy tinguha sa Jaguars nga taposon ang elimination round nga maghupot sa ikaduhang pwesto.

Napakgang ang tuyo sa Jaguars nga mokulit unta sa ilang ika-upat nga kadaugan ug posibleng ang Wildcats maoy ilang pahimungtan ilabi na kay ang nauwahi gikan sab sa kapildehan batok sa Southwestern University (SWU) Cobras, 74-101 upat na ka gabii ang milabay.

Sa higayon nga modaug sila karong gabhiona, kinahanglan na lang nga modaug ang Jaguars batok sa University of Southern Philippines-Foundation (USP-F) Panthers sa kataposan nilang duwa sa elimination round karong umaabot Martes aron opisyal nga huptan ang ikaduhang pwesto luyo sa UV Lancers. 

Ang Jaguars mosandig kanilang Abulaiz Suliman, Miguel Tabaloc, James Regalado, Jason Olbedado ug Banjo Capillar isip pipila sa ilang mga sinaligang beterano.

Sa laing bahin, manghinaut ang Wildcats nga makakuha'g maayong opensa gikan nilang Allan Dimco, Franklyn Batiquin, Jeffrey Taghoy, Julius Tabalin, Bridrick Brigoli, Floyd Taboada ug Axel Rabaya diin sila sab maoy sinaligan alang sa mga puntos.

Sa mga sangka sa high school, tuyo sa defending champion UV Baby Lancers nga mokulit sa ilang ikapitong kadaugan dihang ilang ikasangka ang Baby Jaguars.

Makigtakos ang University of San Carlos (USC) Warriors batok sa University of Cebu (UC) Junior Webmasters ug ang USP-F Baby Panthers makigharung batok sa Don Bosco Technology Center (DBTC) Junior Greywolves.    - BANAT NEWS