CEBU, Philippines - Wala gihapon makatilaw og pilde sulod sa lima ka duwa ang MJDL Customs Brokerage kinsa mipahamtang sa Green cagers sa labing una nilang kapildehan sulod sa iskor, 82-71, niadtong Huwebes sa gabii sa nagpadayong elimination round sa Bureau of Customs - 3rd Major Alfonso Abbariao Cup-2012 basketball tournament didto sa Basak San Nicolas gym, ning dakbayan.
Igo lang naglabaw og gamay ang MJDL sulod sa unang tulo ka quarters pinaagi sa pagpamuntos nilang Jaymar Elloren ug Janus Abellana ug milusad kini'g 19-12 run sa fourth period aron pagselyado sa 11 puntos nga kadaugan.
Nagkumboya silang Elloren ug Abellana og 35 puntos aron pangulohan ang MJDL Brokers pinaagi sa ilang 18 ug 17 puntos matag usa.
Si Noel Medalle maoy nangu sa Green sa iyang 18 puntos ug ang bag-ong minyo nga si Boodie Monteño midugang og 13 puntos. Si Abatar Javellana miamot og 11 puntos alang sa Green kinsa naghupot na karon og 4-1 nga baraha.
Sa sayo, midaug ang Blue Team ni District Collector Ronnie Silvestre batok sa walay daog nga Cebu International Port Users (CIPU) ni Yoly Cena sa iskor, 85-78 alang sa ilang ikatulong daog sulod sa lima ka duwa diin naghupot na sila karon og 3-2 nga baraha.
Gidominar sa Blue ang duwa gikan gyud sa sinugdanan ug miposte sa labing dako nilang labaw nga 11 puntos, 61-50 pagsugod sa fourth quarter.
Silang Tata Laborte ug Rizzan Herbito maoy nangu sa opensa sa Blue sa ilang 23 ug 22 puntos matag usa.
Ang CIPU gipangulohan nilang Jef Garcia ug Cris Manulat sa parehong 16 puntos.
Puntos matag usa:
First Game:
BLUE (85)- Laborte 23, Herbito 22, Mabalo 11, Canete 9, Bacalla 6, Cabahug 4, Gornez 3, Velarde 2, Datu 2, Viodor 2, Manahan 1.
CIPU (78)- Jef Garcia 16, Manulat 16, Ju. Garcia 10, Allerite 10, Pastor 8, Oporto 5, Solidarius 5, Mondin 3, Carmen 2, Canal 2, Pangan 1.
Second Game:
MJDL (82)- Elloren 18, Abellana 17, Cortes 9, B. Medalle 8, Jordan 7, Cabaltera 7, Dejaresco 4, Cal 4, Acebu 4, Lambayan 2, Claro 2.
GREEN (71)- N. Medalle 18, Montenio 13, Javellana 11, Gabica 7, Mose 7, Paghasian 4, Cabrera 4, Alipante 3, Apuya 3, De Gracia 1 - BANAT NEWS