CEBU, Philippines - Milampos ang Smart Gilas Pilipinas sa pagbuntog sa higanteng Iran sa usa ka kulbahinam nga, 77-75, nga kadaugan gahapon didto sa TPEC Gymnasium sa Taiwan.
Ang Smart Gilas nakigsawo karon sa Iran sa liderato sa standing dala ang 5-1 win-loss record sa torneyo. Ang National Team makigharung sa host team Chinese Taipei -A karong alas-10 sa gabii.
Human sa ilang sakit nga kapildehan batok sa Lebanon niadtong Huwebes, 91-72, ang Smart Gilas subling mipakita sa ilang abilidad sa depensa aron pugngan ang mga mas tag-as nga mga players sa Iran .
Nahimong sikit ang duwa sa first half nga miresulta sa 33-all nga panagtabla, apan nakabintaha ang Gilas dihang nakuha nila ang singko puntos nga labaw, 52-47 sa nahibiling 2:33 sa third period.
Gikan didto nakuha sa Gilas ang ilang momentum sa opensa ug sa paningkamot nila ni Marcus Douthit, Jeff Chan ug Gabe Norwood, nakuha sa Pilipinas ang labing dakung labaw nga otso puntos, 63-55 sa 7:33 sa final period.
Misumbalik hinuon og puntos ang Iran aron pahakan ang labaw apan ang three-point ni Norwood ug free-throw ni Chan ang miselyo sa daog sa Pilipinas.
Ang naturalized center nga si Douthit mihimo og double-double 21 puntos ug 11 ka rebounds, samtang si Norwood miposa og 17 puntos.
Duha na lang ka duwa ang nahibilin alang sa Gilas sa Jones Cup diin basihan ang mokampyon sa kun kinsang koponan ang adunay labing nindot nga rekord human sa elimination round. - BANAT NEWS