3 Pinoy gagawa ng pangalan sa Legend Fighting Championship
MANILA, Philippines - Hahakbang sina Ruel Catalan at Rolando Gabriel Dy sa hangaring makagawa ng pangalan sa full contact fighting sa pagsagupa sa mga dayuhang katunggali sa gaganaping Legend Fighting Championship 10 ngayon sa Asia World Expo sa Hong Kong.
Si Catalan na nakababatang kapatid ni four-time World Wushu champion Rene Catalan, ay babanggain si Chinese Sanda champion Ji Xian habang si Dy ay susukatin si Ev Ting ng New Zealand.
Sasalang din sa aksyon ang nagbabalik na muay thai fighter na si Leonard Delarmino na kakalabanin si Choi Yeong Gwang ng South Korea.
Si Rene ang siyang striking coach ni Ruel upang maging madali ang paglipat niya mula sa pagiging isang sanshou fighter sa wushu.
“Naniniwala ako na kapalaran ko ang mapunta rito at magiging Legend champion din ako,” wika ni Catalan.
Ang Legend FC ay laro sa Mixed Martial Arts na may basbas ng South China MMA Association at ginagamit na batas na United Rules of Mixed Martial Arts.
- Latest
- Trending
