Pagara, Servania mo-train sa US

CEBU, Philippines - Human sa impresibo nilang kadaugan sa miaging ‘Pinoy Pride XV’, gibutyag karon ni ALA Promotions CEO Michael Aldeguer nga plano nila nga ipadala sa US aron mag-ensayo sila si Jason Pagara ug Genesis Servania.

Ang duha ka ALA rising stars milampos sa tagsa-tagsa nila ka sangka niadtong miaging Domingo batok sa mga Mehikanong kaatbang.

Si Pagara milampos sa iyang tahas nga panimalos batok sa Mehikanong si Rosbel Montoya kinsa iyang gi-TKO sa round six, samtang si Servania yanung mikulata ni Jorge Pazos.

Sa taho sa boxingscene.com, si Aldeguer nakighinabi ni Robert Garcia kinsa misaad nga musuway paghatag og panahon aron magiyahan ang mga ALA boxers sa ilang ensayo didto sa gym niini sa California.

Si Garcia kinsa usa sa mga sikat nga boxing trainer karon maoy responsable sa kalampusan sa boxing career nila ni super bantamweight champion Nonito Donaire, Kelly Pavlik, Marcus Maidana, Brandon Rios ug Mikey Garcia.

Gawas nila ni Pagara ug Servania, laing boksidor nga posibling ipadala sa US mao si AJ Banal kinsa mangandam sa iyang WBO bantamweight title fight sa Oktobre 20 batok ni Thai Pungluang Sor Singyu didto sa Manila.  – BANAT NEWS