USC ug UV nakasagunson

CEBU, Philippines - Padayong mikulit og managlahing daog ang University of San Carlos (USC) ug ang University of the Visayas diin sagunson nga ikatulong daog samtang nakarekober sab dayon ang defending champ Sacred Heart School-Ateneo de Cebu (SHS-AdC) ubos sa Small Basketeers Philippines (SBP) division sa BEST Center SBP Passerelle Twin Tournament nga gipaluyohan sa Milo.

Gisungag sa USC ang Don Bosco Technology Center, 59-12, gilubong sa UV ang University of San Jose-Recoletos, 62-21 ug gipukan sa SHS-AdC ang Cebu Eastern College (CEC), 33-22.

Grabeng depensa ang gihimo sa USC dihang dos puntos lang ang ilang gitugot nga ma--iskor sa Don Bosco sa first ug sa second quarter aron moposte'g 45-4 nga labaw atol sa halftime.

Silang Michael Jay Cutamora ug Carl Jericho Jovellanos mibahug og 1 ug nuybe puntos matag usa aron pangulohan ang USC.

Sa ilang bahin, ang 3-0 nga UV, yanong mipukan sa Baby Jaguars ug human sa ilang 14-5 nga labaw sa first quarter, ila kining gi-inat ngadto sa 34-10 nga abante sa halftime. Misamot kadako ang labaw sa UV human sa third period, 56-17 apan medyo mihinay ang ilang opensa sa fourth quarter.

Si Zachlean Quilantang maoy nagtimon sa balanseng opensa sa UV ug mi-iskor siya'g nuybe puntos.

Ang SHS-AdC sa laing bahin kinsa gikan pa sa pilde batok UV, mikulit sa ilang ikaduhang daog sulod sa tulo ka duwa ug adunay 2-1 nga baraha diin si Rubick Bacao maoy misalida og maayo pinaagi sa iyang 13 puntos.

Nahiagom na karon sa ilang ikatulong pilde ang CEC (0-3) samtang nagsawo sa liderato ang USC ug UV sa ilang 3- 0 nga baraha matag usa. Gisundan sila sa SHS-AdC (2-1), USJR (1-1) ug nagtabla ang CEC ug Don Bosco sa 0-3.

Ang top four maoy moabante sa semifinals diin ang #1 makigsangka batok sa #4 ug ang #2 makigharung batok sa #3.

Sa Passerelle division, parehong midaug ang SHS-AdC ug CEC batok sa ilang mga kaatbang.

Ang Magis Eagles kinsa tuyong mokulit sa ilang ika-unom nga kampiyonato, misandig kang Arnie Padilla aron pagpukan sa USJR, samtang gi-tripingan sa CEC ang Southwestern University, 98-23. Parehong nahimutang sa Group A ang SHS-AdC ug CEC sa Passerelle division samtang ang pre-tournament favorites nga UV ug USC pulos tua sa Group B.

Sa Passerelle division games ubos sa CYBL D-League, gilubong sa UV-B ang CITU-B, 59-34 ug gipalagpot sa USC South-B ang DBTC human sa ilang 45-19 nga kadaugan ug ang USC North-C naka-eskapo batok sa SHS-AdC 2, 43-41.  – BANAT NEWS