USC, UV 2-0 sa Milo BEST

CEBU, Philippines - Parehong mikulit sa ilang ikaduhang daog ang University of San Carlos (USC) ug ang University of the Visayas (UV) sa Small Basketeers Philippines (SBP) division sa nagpadayong BEST Center SBP/Passerelle Twin Tournament 2012.

Gilubong sa USC ang Cebu Eastern College (CEC) Dragons, 58-38, samtang ang UV mipakurat sa "back-to-back" defending champion Sacred Heart School-Ateneo de Cebu (SHS-AdC) Magis Eagles, 49-40.

Nagkamang ang iskor sa duwa pagsugod sa duwa, apan ang USC daling misumbalik aron inaton ang ilang 15-7 nga labaw ngadto na sa 32-12 sa halftime.

Sukad niadto, ang USC wala na mohatag og higayon sa CEC nga makasikit pa hangtod nahuman ang duwa.

Sila si Neon Chavez ug Jholo Pakanna parehong miposa og 13 puntos.

Sa laing bahin, ang UV sayong nanginit diin miposte kini og 18-4 nga bentaha sa first quarter.

Si Zachlean Quilantang maoy nangu sa Baby Lancers pinaagi sa iyang 12 puntos.

Sa laing duwa, ang University of San Jose-Recoletos (USJ-R) walay kukaluoy nga milubong sa Don Bosco Technology Center (DBTC), 46-21 alang sa una nilang daog.

Sa Passerelle division, pulos sab midaog ang UV-A, USJ-R ug ang CIT-U-A batok sa tagsa-tagsa nilang kaatbang.

Ang UV-A midaog batok sa USC, 53-46, ang USJ-R milampurnas sa Southwestern University (SWU), 71-39 ug ang CIT-U-A nakaipsot sa DBTC, 50-44.

Sa mga aksiyon sa CYBL D-League, ang UV-B ug ang USC South-B midaog aron magbitbit og managsamang 2-0 win-loss records. (BANAT)