UV, USJ-R mag-ilog sa solong liderato

CEBU, Philippines - Magtakus ang pulos walay pilde nga University of the Visayas (UV) Green Lancers ug University of San Jose-Recoletos (USJ-R) Jaguars alang sa solong liderato sa 12th Cebu Schools Athletic Foundation Inc. (CESAFI) basketball tournament karong gabii diha sa Cebu Coliseum.

Sa usa sa mga duwa sa secondary matches, ang walay pildeng Sacred Heart School-Ateneo de Cebu (SHS-AdC) Magis Eagles mosuway pagdagit sa ilang ikalimang sunod-sunod nga daog sa dihang ilang sangkaon ang Cebu Institute of Technology-University (CIT-U) Wildkittens.

Sa kasamtangan, ang Lancers ug ang Jaguars nagsawo sa liderato sa collegiate division sa managsama nilang 3-0 win-loss records.

Ang 6-foot-7 Nigerian nga si Steve Cedric Akomo mahimong magdungan og sulod uban ni   Hernal Escocio ug nilang Rene Jun Sayson, Andrew Avillanoza, Chris Perolino ug Rhaffy Octobre.

 Anaa sab sa UV Lancers ang mga beteranong guwardiya nga sila si Phil Mercader, Eman Calo ug John Michael Abad ug sa graduating nga si Jerome Silva.

Apan dili angay mokompiyansa ang Lancers ngadto sa Jaguars tungod kay ang naulahi nakapakita sa ilang maayong depensa batok sa mga higanteng players dihang ilang gipilde ang Southwestern University (SWU) Cobras, 80-72, bisan pa sa presensiya sa Cameroonians nga sila si Benoit Mbala ug Justin Aboude.

Dili sab magpalupig ang Jaguars kay aduna sab sila'y kaugalingon alas nga si Abulaiz Suliman uban nilang Miguel Tabaloc, Jason Olbedado, Banjo Capillar, Renato Abing, Medjet dela Rama ug James Regalado.

Sa laing mga sangka sa secondary, ang University of San Carlos (USC) Baby Warriors (2-1) makigbatok sa Cebu Eastern College (CEC) Dragons (2-2), samtang ang Baby Jaguars (1-4) makigtakus sa walay daog-daog nga University of Southern Philippines Foundation (USPF) Baby Panthers (0-4). - BANAT NEWS