Kapin sa 200 shuttlecock artists moapil sa Thirsty Badminton Cup

CEBU, Philippines - Kutob na lang karong adlawa sa alas-12 sa udto katapusang pagpanawat og registrants alang sa Thirsty Badminton Cup nga moulbo ugma diha sa Metro Sports Badminton Club (MSBC) sa Lahug.

Adto ang registration sa Metro Sports Badminton Club.

Kapin sa 200 ka manuwaay og badminton ang mopakita'g aksiyon sa maong torneyo.

Aduna kini registration fee nga P750 matag player lakip na ang event t-shirt. Niadtong gustong moapil og laing duwa mobayad na lang og dugang P500.

Ang mga entrante bahinon sa duha ka grupo -- smoothies ug shakers.

Ang smoothies division gilangkuban sa upat ka levels -- C, D, E ug F diin ang matag level adunay daghang events.

Bukas sa tanan ang tanang levels gawas lang sa level nga alang lamang sa mga residente sa Cebu.

Ang level C adunay duha ka events, men's doubles ug mixed doubles, samtang ang ubang levels susama og events sa level C ug aduna pay ladies' doubles.

Sa laing bahin, ang shakers division eksklusibo lamang sa magduduwa nga nag-edad og 40-anyos ug pataas. Gibahin kini ngadto sa duha ka grupo -- D ug E diin ang level D adunay men's ug mixed doubles ug ang level E mao lang ang men's doubles.

Gawas sa Cebu, mosalmot sab ang shuttlecock artists gikan sa Cagayan de Oro City, Tagbilaran ug ubang bahin sa Bohol, Maasin, Ormoc, Iligan ug Tacloban.   - BANAT NEWS