Jaguars wa'y pilde

CEBU, Philippines - Nagmangtas ang senior player nga si Abulaiz Suliman ug siya maoy nangu sa University of San Jose Recoletos (USJR) Jaguars ngadto sa 89-72 nga paglubong sa defending champion University of Cebu (UC) Webmasters kaniadtong Sabado sa gabii atol sa nagpadayong 12th season sa Cebu Schools Athletic Foundation, Inc. (CESAFI) didto sa Cebu Coliseum.

Ang maong kadaugan naghatag sa Jaguars og hapsay nga 3-0 nga baraha aron paghupot sa solong liderato sa kasamtangan samtang ang nagsangki-ig nga Webmasters mihagsa ngadto sa 1-2 nga baraha.

Misakmit og 21 puntos si Suliman aron pangulohan ang opensa sa Jaguars ug gawas kaniya, init sab ang iyang mga kauban hinungdan nga naglisod og maayo ang Webmasters kung unsaon sila pagpiog. Dili lang kay nalupig sa depensa, kulatado sab ang UC gikan sa three-point arc, sa undergoal ingon man sa puntos gikan sa free throws. 

Gisuportahan sab si Suliman sa laing mga beterano nga silang Miguel Tabaloc ug Medjet dela Rama kinsa mibahug og 14 ug 11 puntos, matag usa.

Duha ka nagsunod nga three-point plays gikan kang Suliman ang misugat sa Webmasters sa fourth period ug usa ka kagumkom nga three-pointer ni James Regalado ug gitiwasan sa laing tres ni rookie forward Mark Lancer Friolo maoy mipakaging sa Webmasters aron mabiyaan kini'g 20 puntos, 89-69 sa nahibiling 30 segundos sa duwa.

Sa sayo pa, daw nakabsan gyud sa swerte ang UC tungod kay gitawagan og unsportsmanlike foul si Jan Michael Auditor kinsa giingong misal-ot sa iyang tiil ngadto kang Matthew Parker nga misuway unta'g buylo alang sa usa ka fastbreak opportunity. 

Giila unta ang Webmasters isip comeback kids apan wala kini mahitabo kaniadtong Sabado ug wala sab mosaler ang ilang depensa kay lihay kaayo ang Jaguars. Uwahi sab miabot ang ubang players sa Webmasters tungod kay wala damha nga sayo kaayong nahuman ang duha ka duwa sa high school tungod kay lubong na man kaayo ang mga kontra, ang mga coaches sa naglabaw nga teams wala na magkinahanglan ug timeouts.

Si Robinson Mohammad maoy nangu sa Webmasters human siya moposa og 20 puntos samtang midugang og 15 puntos si Kim Gomez ug may 11 puntos si Auditor apan igo lang naka-amot ug nuybe puntos ang bulldozing guard nga si Quinton Brian Heruela kinsa medyo na-apektohan sa hugot nga depensa nga gipatuman sa Jaguars diin nagpuli-puli og bantay kaniya silang Suliman, Tabaloc ug ang heavyweight nga si Matthew Parker.

Gigukod sa Webmasters ang ilang 17 puntos nga biya sa uwahing bahin sa second period, 18-31 ug nahimo na lang kining kuatro puntos atol sa halftime, 31-35 aron magpakita'g senyales nga andam nilang papason ang labaw sa Jaguars.

Hinoon, wala kini mahitabo sa second half ug wala motugot niini ang Jaguars.  

Sa miaging tuig, midaog sa una nilang panagbagat ang UC, 95-87 nga nag-agi una'g singko minutos nga overtime. Dili kaayo maayo ang miaging tuig alang sa Jaguars tungod kay sayo silang natagak.

Puntos matag usa:   

USJ-R (Srs.) 89---     Suliman 21, Tabaloc 14, Dela Rama 11, Sanchez 9, M. Parker 7, Regalado 6, C. Parker 5, Olbedado 4, Friolo 3, Abing 2, Capillar 2, Lajato 2, Medalle 1

UC (Srs.) 72---          Mohammad 20, Gomez 15, Auditor 10, Heruela 9, Cueva 8, Wagas 5, Cabrera 3, Asis 2.