CEBU, Philippines - Ning nagkahayag niyang damgo nga mahimong world champion, si undefeated Cebuano lightweight Mercito 'No Mercy' Gesta misaad nga mohimo og subsob nga ensayo alang sa iyang IBF lightweight title fight sa nanghinapos nga bahin ning tuiga.
Gikataho nga gipili ni Top Rank Inc. CEO Bob Arum si Gesta nga mahimong sunod nga challenger alang sa IBF belt nga kasamtangang gihuptan ni Mexican champion Miguel 'El Titere' Vasquez sa Oktubre o sa Nobiyembre.
Kini human sa impresibong ninth round stoppage ni Gesta batok sa Amerikanong si Ty Barnett sa miaging semana didto sa Texas Station Casino sa Las Vegas, Nevada.
Ang amahan ug trainer ni Gesta nga si Anecito, nagkanayon nga andam sila sa maong world title fight, apan kinahanglan una nila nga mapalambo pa ang kapaspas ug stamina sa iyang anak aron maseguro ang ilang kadaugan.
"Dugay na gyud nga gidamgo ni Gesta nga moaway og world title," matud pa ni Anecito. "Andam ako anak, pero amo pa i-improve ang iyang stamina ug speed."
Ang Mexican champion nakadepensa na sa iyang bakus sa ikatulong higayon, labing uwahi mao ang iyang unanimous decision nga kadaugan batok ni Panamanian Ammeth Diaz niadtong Enero didto sa Mexico.
Si Vasquez adunay rekord nga 31-3, 13KOs, samtang si Gesta adunay 26-0, 14KOs. - BANAT NEWS