Jaguars 2-0 na karon

CEBU, Philippines - Gipakuratan dayon sa University of San Jose Recoletos (USJ-R) Jaguars ang Southwestern University (SWU) Cobras pinaagi sa paggamit og impresibong depensa batok sa duha ka Cameroonians nga silang Justin Aboude ug Benoit Mbala ug miiskor og 80-72 nga kadaugan aron pakgangon ang debut sa Cobras niadtong Sabado sa gabii atol sa nagpadayong ika-12th season sa Cebu Schools Athletic Foundation, Inc. (CESAFI) didto sa Cebu Coliseum.

Mas tag-as silang Aboude ug Mbala apan giputlan sila sa gitas-on tungod kay wala mahadlok kanila ang Jaguars kinsa nagpakita'g kugi ug kaisog sa ilang depensa aron dili makapatuyang og pamuntos sa ilawom ang duha ka imports gikan sa Cameroon.

Sa wala pa ang duwa, nagkanayon ang team manager sa Jaguars nga si Raffy Senining nga mas tag-as ang Cobras apan mipahimangno nga basin og makuratan ang Cobras kung dili makabantay sa depensa nga ipahamtang sa Jaguars.

Tuod man, naglabaw dayon og 13-2 ang Jaguars og bisan ug nalabwan sila didto sa third period, wala sila magkaguliyang hinoon, mas mihugot ang ilang depensa sa kataposang mga gutlo sa fourth period. 

Ang senior player nga si Abulaiz Suliman maoy nahimong yawe sa kadaugan ug siya maoy nangu sa opensa sa iyang 16 puntos apan mas misulbong si Medjet dela Rama kinsa miamot og 10 puntos bisan og wala kaayo siya hatagi og taas nga playing time ni coach Edito Salacut.

Nakatampo sab og dako sa maong kadaugan silang Matthew Parker ug maguwang nga si Christian Parker.

Tungod sa maong kadaugan, nag-una na ang Jaguars sa collegiate division sa ilang 2-0 nga baraha.

Si Mbala maoy nangu sa Cobras sa iyang 15 puntos bisan pa og daghan siyang sipyat sa free throws. Miamot og 13 puntos si Monbert Arong ug silang Bonifacio Guillena III ug Joseph Nalos parehong may 10 puntos apan igo lang miamot og otso puntos si Aboude.

Dili kadto maoy unang higayon nga napilde ang Cobras sa ilang opening game tungod kay sa miaging tuig, nagsugod sila'g 0-2 apan mi-abante lang gihapon sa finals. Duha ka higayon nga napilde og sikit kaayong duwa ang Cobras sa miaging tuig--- una batok sa USC Warriors, 63-65 ug ikaduha batok sa USP-F Panthers, 59-62 ug nahitabo kadto nga diha pa kanila silang Eleazar Armecin ug Rene Pacquaio.

Apan dihang nakasugod sila'g daog, milampos sila pag-abante sa finals apan napilde sa UC Webmasters sa usa ka kulba-hinam kaayong best-of-five championship series.

Puntos matag usa:

USJ-R (Srs.) 80---    Suliman 16, Dela Rama 10, M. Parker 10, Tabaloc 8, Regalado 7, Abing 6, C. Parker 6, Capillar 5, Olbedado 5, Lajato 4, Sanchez 3

SWU (Srs.) 72--- Mbala 15, Arong 13, Nalos 10, Guillena 10, Bregondo 9, Aboude 8, Ortuyo 4, Lopez 2, Goloran 1 Halftime: 43-39

IBP-B ug Bhutakalz sa finals

Maoy magbagat ang IBP-B ni skipper Allan Geotina ug ang Bhutakalz nga gipangulohan ni Khan Guieb alang sa finals sa Wednesday Club-2012 basketball tournament didto sa Capitol Parish gym sa dan Escario, ning dakbayan.

Nakuha sa IBP-B ang unang luna sa finals dihang yano nilang gidispatsar ang sister team IBP-Gwapo sa iskor, 91-79, niadtong Miyerkules sa gabii samtang naangkon sa Bhutakalz ang ikaduhang luna sa finals human sila maka-eskapo batok sa mas inilog nga PICPA ni Yoly Meso, 71-69 sa usa ka come- from-behind fashion. 

Magtakos ang IBP-B ug ang Bhutakalz sa finals unya sa Miyerkules sa gabii.

Milabaw lang og dos puntos ang IBP-Gwapo, 44-42 pinaagi sa tandem nilang Giovani Sususo ug Milky Villamor apan nagmangtas angIBP-B didto sa third period ug misukli kini'g 26-17 rally gikan kanilang Niño Busi, pointguard Reiner Apolinario ug skipper Geotina diin ilang nailog ang labaw, 68-62 pagsugod sa final quarter.

Milampos pagkulit og 12 puntos nga kadaugan ang IBP-B dihang mi-abmit sa opensa silang Michael Molde ug Busi.

Sa laing duwa, naglabaw unta ang PICPA sulod sa tulo ka quarters ug nakahimo pa pagposte og 13 puntos nga abante, 56-43 padulong sa fourth quarter apan nanginit og kalit ang Bhutakalz kinsa mipabuhagay og 28-14 scoring run.

Wala madugay, misikit pagbalik ang duwa ug dayon ang krusyal nga jumpshot ni Cris Ang sa nahibiling 24 segundos maoy nagtabla sa iskor ngadto sa 69-all.

Nahimong bayani si Guieb alang sa Bhutakalz human mosulod ang iyang undergoal stab sa kataposang otso segundos aron mokulit og come-from-behind nga kadaugan.

Ang gamitoy nga three-point artist nga si Deo Alvios maoy nangu sa Bhutakalz sa iyang 25 puntos diin unom niini ang three-pointers. Nagkumboya silang Guieb ug Ang og 22 puntos sa maong kadaugan.

Silang Ban Talaroc ug Ryan Alejandre maoy nangu sa PICPA sa ilang 16 ug 12 puntos, matag usa.

Puntos matag usa:

First Game:

IBP-B (91)- N. Busi 18, Apolinario 15, Geotina 11, Molde 11, B. Busi 10, Baguio 9, Raboy 6,

Lagahit 5, Liston 4, Denopol 2. 

IBP-GWAPO (79)- Sususco 13, Narido 13, Villamor 12, Riveral 12, Velez 11, Cabilte 8, Abcede 4, Tabotabo 2, Calipayan 2, Cruas 2.

Second Game:

BHUTAKALZ (71)- Alvios 25, Guieb 12, Ang 10, Verallo 8, Ligutan 8, Arnaiz 7, Villarin 1. 

PICPA (69)-

Talaroc 16, Alejandre 12, Matugas 9, Flores 8, Suelto 7, Meso 4, Endrina 4, An. Yu 4, Salubre 2, Gonzales 2,

F. Yu 1.

Simple likes ug Evoo Resto bar midaug

Mikulit dayon og daog ang kanhi champion Simple Likes Barbecue Haus pinaagi sa pag-iskor og 89-79 nga kadaugan batok sa mas paspas nga Harolds Hotel kaniadtong Biyernes sa gabii atol sa nagpadayong F. Llamas Youth Association (FYA) basketball tournament didto sa barangay Tisa covered court, ning siyudad.

Sa laing duwa, midaug ang Evoo Resto Bar batok sa Tupas Cycling Center sa iskor, 75-59.

Aron dili makabuylo sa fastbreak ang Harolds Hotel, gidala sa Simple Likes ang duwa didto sa gawas aron adto sila magtigi sa mga tirada sa gawas diin mas nakabentaha ug dako ang Simple Likes kay mapugos man sab pagdepensa sa gawas si Dondon Cadungog, ang labing kusog nga point guard sa FYA.

Ilang gipamatudan nga husto ang maong game plan ug mag-igo silang Lito Mirasol og Noel Medalle ug mi-iskor sila'g 20 ug 15 puntos, matag usa samtang pulos miamot og double figures silang Jakeson Dumaguit, Onyot Masongsong ug Ryan Villaver alang sa Simple Likes.

Si Ranoy Sabalande maoy nangu sa Harolds Hotel pinaagi sab sa iyang 20 puntos samtang midugang og 12 puntos si Cadungog.

Si McLean Alkuino maoy nangu sa Evoo Resto Bar sa iyang 23 puntos ug si Pangkoy Paracuelles maoy nangu sa Tupas Cycling Center sa iya sab nga 23 puntos.

Ang FYA tournament chairman mao si kanhi Punta Princesa barangay konsehal Boy Atillo ug gipaluyohan ni Tisa barangay captain Eddie Cabulao.

Puntos matag usa:

First Game:

Simple Likes (89)--- Mirasol 20, Medalle 15, Dumaguit 14, Masongsong 13, Villaver 10, Dacayana 7, Codilla 6, Zapanta 6, Trinidad

Harolds Hotel (79)-- Sabalande 20, Atuel 14, Barro 13, Cadungog 12, Ropal 8, Cal 7, Cueme 2, Tolentino 2

Second Game:

Evoo Resto Bar (75)--- Alkuino 23, Caballes 18, Mayol 13, Endrina 9, Medalle 4, Macachor 4, Ponce 2, Carzano 2

Tupas Cycling Center (59)---Paracuelles 23, Alguirre 13, Lañojan 10, Lavandero 7, Lim 4, Haincanto 2, Dakoykoy 2 (BANAT NEWS)