Go Pinoys!
Lima na ka mga atletang Pinoy ang natagak sa 2012 London Olympics human ang atong pambato sa judo 100 kg class nga Filipino-Japanese Tomohiko Hoshina sayo kaayong gidemolis ni South Korean champion Kim Sung-Min.
Si Hoshina, kinsa sa sayo pa mipadayag sa iyang kaandam daw nakalitan sa first round nga ataki ni Kim pinaagi sa usa ka harai-goshi throw nga nagdala sa buko-buko ni Hoshino sa tatami. Kini gitawgan dayon sa mga referee "ippon."
Ang tanang judoka pulos maninguhang maka-"ippon" batok sa ilang mga kaatbang tungod kay kini usa ka awtomatikong desisyon nga makapapilde sa ilang mga kaatbang ug sure win sa ilang habig.
Ang division nga giduwaan sa 5-foot-11 ug 276 lbs nga si Hoshina dili basta-basta lang tungod kay kini ang gitawag nga super heavyweight sa maong kompetisyon sa judo. Ang judoka sa France nga si five-time world champion Teddy Riner, 6-foot-8 ug 289 lbs ang timbang.
Ang nakapildi ni Hoshina nga si Kim 6-foot-3 ug 280 lbs dili usab tantong ikauwaw tungod kay siya maoy 2008 Asian Judo Champion ug bronze medalist sa World Judo Championships sa miaging tuig.
Ang kababayan ni Hoshina nga si Kamikawa Daiki sa Japan adunay gitas-on nga 6-foot-1, apan ang gibug-aton lapas sa 300 lbs ug kanhi world champion nga nakapilde na kang Riner sa open weight division niadtong 2010.
Hinuon angayan natong ikapasigarbo si Hoshina tungod kay mas gipalabi niya ang pagka-Filipino isip anak sa usa ka Filipina.
Pinaagi sa iyang kaugalingong paninguha miapil siya og mga kompetisyon didto sa ubang nasud samtang nagtudlo usab isip maestro sa usa ka tunghaan sa Japan.
Sa kaugalingong paningkamot nakapasar si Hoshina sa qualifying tournaments aron makasulod sa London Olympics dihang nalakip siya sa Top 20 sa Asya ug nakakuha og paigong puntos sa 2011 World Judo Championship.
* * *
Ari ta sa gitawag karong "Little Pacquiao" nga si Mark Anthony Barriga, kinsa impresibong midismantol sa Italian boxer nga si Manuel Cappai niadtong Sabado sa debut niini sa Olympics.
Dili lang kitang mga Filipino ang mibilib kaniya kay apil ang nagkadaiyang mga coaches sa boxing sa ubang mga nasud nga dunay entry sa Olympics mibilib usab kang Barriga.
Kagabii alas-8:45 mosulod sa round 16 ang 19-anyos nga si Barriga batok sa Kazakhstan boxer nga si Birzhan Zhakypov nga mas maguwang niya og siyam ka tuig.
Dunay mga kabalaka ang mga boxing experts sa Pilipinas nga basin daw maimpluwensyahan ang mga judges tungod kay ang mga labaw sa AIBA mga Kazakhs o kababayan ni Zhakypov, kinsa mipilde pinaagi sa usa ka puntos sa uwahi niining gikasangka nga French boxer. Unsa man ni mura'g Pacquiao-Bradley?
PAGTULON-AN: Ayaw hukmi ang misuway apan naparot. Mas angayang hukman ang napakyas nga wala mosungasong. -- unknown author
- Latest
- Trending
