Alaska IronKids Philippines Triathlon mosikad karong adlawa sa Shangri-la

CEBU, Philippines - Maglumbaanay na karon ang 139 ka mga bata sa pagsikad sa ikatulong edisyon sa Alaska IronKids Philippines Triathlon didto sa Lapu-Lapu shrine sa Brgy. Mactan.

Ang Alaska IronKids Philippines Triathlon maoy children's version sa nabantog nga Cobra Ironman 70.3 Philippines nga moulbo ugma didto sa Shangri-la Mactan Resort and Spa sa Lapu-Lapu City.

Karong tuiga maoy labing daghang mga partisipante sukad   namugna ang tinuig nga kalihukan tulo na ka tuig ang nilabay. Mga bata nga nagpangedaron og unom hangtod sa 14-anyos ang magtigi sa dungog ning maong kompetisyon nga sugdan ug tapuson sa atubangan sa Shangri-la Mactan Resort and Spa grounds.

Ang usa ka adlaw nga lumba maglatid og 100-meter swim, 3km bike ug 1km run alang sa mga gagmay'ng bata ug 300m swim, 10K bike ug 2K run sa mga batan-on.

Gawas sa Alaska, ang kalihukan gipaluyohan sab sa McDonalds, Time Studio, Powerade, Prudential Guarantee, Private Iris ug Viva Mineral Water.