CEBU, Philippines - Moabot ngadto sa 31 ka teams ang magbagat alang sa Milo-backed BEST SBP/Passerelle Twin Tournament 2012 ug sa CYBL D-League nga sugdan karong adlawa didto sa Sacred Heart School-Ateneo de Cebu Gym sa Brgy. Canduman, Mandaue City.
Sa 31 ka teams, 11 niini ang mosalmot sa 26th BEST SBP Passerelle Tournament ug sa 3rd CYBL D-League.
Pangunahan sa SHS-Ateneo de Cebu nga maoy kampiyon sa duha ka torneyo. Tinguha sa Magis Eagles nga sakmiton ang ikaunom nilang sunod-sunod nga korona sa Passerelle division, samtang ang mas batan-on nilang counterparts gustong mokulit og three-peat sa Small Basketeers Philippines (SBP) division.
Napanglantawan nga mas sikit ang mga duwa karong tuiga tungod sa pagsulbong sa basketball program sa University of the Visayas (UV) high school ug pagsalmot sa University of San Carlos (USC) Baby Warriors.
Ang UV maoy kampiyon sa SBP National U16 niadtong Enero. Sila usab ang runner-up sa Passerelle division sa miaging tuig. Ang UV sab maoy second placer sa San Beda/Taytay sa Coke PBA Youngstars Basketball Tournament niadtong Mayo.
Ang grassroots program sa UV nakaumol na og mga talentadong players nga maoy dakung hulga sa SHS-Ateneo karong tuiga.