CEBU, Philippines - Mas paborito ang Southwestern University (SWU) Cobras sa ilang pagtunob sa korte batok sa University of San Jose- Recoletos (USJ-R) Jaguars karong gabii sa bugtong collegiate match sa 12th Cebu Schools Athletic Foundation, Inc. (CESAFI) diha sa Cebu Coliseum.
Ang presensiya sa duha nilang Cameroonian players nga silang Justin Aboude ug Benoit Mbala maoy makapalig-on sa Cobras itandi sa Jaguars o mas bentaha sa ubang teams.
Ang Jaguars ni coach Edito Salacut miangkon nga maglisod sila’g pilde sa Cobras pero aduna sila'y sikreto pagpugong sa mga higante sa Cobras.
Aduna sab sila'y alas sama nilang Abulaiz Suliman, Miguel Tabaloc ug Jason Olbedado nga andam moalkontra nilang Bonifacio Guillena III, Joseph Nalos ug Benito Ortuyo.
Ang duwa tali sa Cobras ug Jaguars dag-on sa ilawom ug dili sa perimeter. Gawas lang kun buynason ang Jaguars dili gyud kini kapugngan.
Ang Jaguars mosandig sa ilang shooters nga silang James Regalado, Banjo Capillar ug Renato Abing nga maoy ilang ikatugbang batok nilang Bernie Bregondo, Monbert Arong, Daryl Goloran, Jestoni Dedace ug Merbien Escobio.
Ang Jaguars midaog sa una nilang duwa batok sa University of San Carlos (USC) Warriors 82-78 niadtong Domingo.
Sa dili pa ang SWU-USJR showdown, unahon una ang tulo ka duwa sa high school diin ang UV Baby Lancers mosugod sa ilang title defense batok sa Cebu Institute of Technology-University (CIT-U) Wildkittens sa ikatulong duwa sa alas-4:30 sa hapon.
Sa pasiunang duwa sa ala-1 sa hapon, ang Cebu Eastern College (CEC) Dragons makigsangka sa Don Bosco Greywolves, samtang ang Sacred Heart School-Ateneo de Cebu (SHS-AdC) Cebu Magis Eagles moharong sa USJ-R Baby Jaguars sa alas-2:45 sa hapon.