Goldberry miiskor og upset sa SHAABAA

CEBU, Philippines - Gipakita sa Goldberry Suite ang ilang kaandam nga mosakmit pagbalik sa korona dihang ilang gipukan ang defending champion Dynamic Power, 46-39 sa 17th Sacred Heart-Ateneo Alumni Basketball Athletic Association (SHAABAA) didto sa SHS-AdC Canduman campus gym, Mandaue City.

Wala moduwa ang ilang star player nga si Dave Lim, apan giagak kini ni Jeremy Huang, kinsa maoy nangulo sa Goldberry pinaagi sa iyang 15 puntos. Ang Dynamic Power gipangulohan sab ni Theogene Lim sa iyang 14 puntos.

Sa laing duwa, ang Gaisano Capital midaog batok sa Team Japfa sa iskor nga 64-58.

Naglabaw og 11 puntos ang Gaisano Capital sa opening period, 24-13 apan mibugnaw sa second quarter nga maoy naghatag og higayon sa Japfa pagkitkit sa labaw ngadto na lang sa tres puntos, 34-31 sa halftime.

Dali hinuon nakabawi ang Gaisano Capital sa third period pinaagi sa paglusad og 16-8 run aron moposte og double figures nga bentaha.

 Si Patrick Jacobe miposa og 18 puntos aron pangulohan ang Gaisano Capital, samtang si Ed Macasling, kinsa miburak og 21 puntos mao sab ang nangulo sa pilderong Japfa.

Sa lain pang mga duwa, ang Insular Square sa pagpangulo ni Franz Cimafranca batok sa RDAK sa iskor nga 58-55. Midaog sab ang A Team batok sa Fiesta Cebuana sa iskor nga 55-48, ang Twin Tower Blue mipilde sa ilang sister-team Twin Tower Gold sa iskor nga 55-46 ug ang Cebu Landmasters yano kaayong milubong sa SHS-AdC Faculty and Staff Team sa iskor 75-42.   - BANAT NEWS