CEBU, Philippines - Gilubong sa Grace Bostolits ni three-point artist Toly Petiluna ang Suran, 101-86 alang sa ikalima nilang daog aron mag-una sa liderato sa Upper Bayanihan Catholic Association (UBCA) Camp 2012 basketball tournament niadtong Domingo didto sa barangay Quiot Sports Complex, ning dakbayan.
Sayong nakalabaw ang Suran, 30-22 sa tandem nilang Doy dela Cerna ug Allan Borces apan mi-rally ang Bostolits sa second period dihang misukli kini’g makabungog nga 44-17 run ubos sa pagpangulo sa high-leaping center nga si Roger Quitoy ug Dindo Dela Peña aron molabaw og 19 puntos sa halftime, 66-47.
Si Petiluna maoy nangu sa Bostolits sa iyang 24 puntos, lakip na ang unom ka triples, samtang si Ace Dela Cerna mao sab ang nangu sa Suran sa iyang 16 puntos.
Sa sayo pa, gilubong sa Mayupay-ICC Pharmacy ang walay daug-daug nga OYAB, 103-88 sa pagpangulo ni Vic Murillo nga miburak og 21 puntos. Ang OYAB gipangulohan ni Tata Lawas sa iyang 25 puntos.
Midaog sab ang Quiot-San Roque batok sa Yati-San Isidro, 96-89.
Puntos Matag Usa
Unang duwa:
MAYUPAY (103) - Lasque 21, V. Murillo 15, Palma 14, Lawas 14, Padillo 10,
J. Dada 10, Yap 8, Cagakit 5, N. Celestial 4, B. Celestial 2
OYAB (88) - Lawas 25, Cañete 14, Zaballero 14, Bulongan 12, Nepomuceno 14, Nacorda 6, Llamedo 5, Delima 2
Ikaduhang duwa:
BOSTOLITS (101) - Petiluna 24, Quitoy 23, Dela Peña 8, N. Llamedo 7, Ochigue 6, Patrimonio 6,
Francisco 6, Malalay 6, Hyperwage 6, Pizon 5, Llanura 2, Regis 2
SURAN (86) - A. Dela Cerna 16, D. Dela Cerna 13, Pahamutang 12, Carreon 10, Borces 10, Estrada 9, Sabandeja 8, Saromines 6, Louie 2. - BANAT NEWS