CEBU, Philippines - Milampos si Virgilio 'Maton' Silvano (12-2, 7KOs) sa Omega Boxing Gym pagsakmit sa Philippine Boxing Federation (PBF) light flyweight title human niya gipaundang sa fourth round si Charlie 'Steelbar' Cabilla (12-11, 2KOs) sa main event sa "Fight Fury 1" niadtong Domingo sa gabii didto sa J Centre Mall convention hall sa A.S. Fortuna st., Mandaue City.
Ang garbo sa Dalaguete, Cebu mipahimulos sa iyang kapaspas ug kusog aron dismantulon sa sayon nga paagi si Cabilla, kinsa natumba sa matag round sud sa upat ka hugna.
Unang gipatumba ni Silvano si Cabilla gamit ang usa ka hook sa apapangig sa opening round, gisundan kini sa usa ka body shot nga mipaluhod ni Cabilla sa second round.
Miaksyon og sukol si Cabilla sa ikatulong round gamit ang iyang mga jabs, apan wala gihapon kini mosalir ug natumba na sab kini.
Hingpit natapos ang away sa fourth round dihang si Silvano mapatugpa og solidong right hook nga nakapatumba ni Cabilla. Nalup-og si Cabilla ug naglisod kini pagsukol hinungdan nga giundang ni referee Ben Necesario ang away sa oras nga 2:55 sa maong round.
Sa supporting bout sa boxing event nga gipasiugdahan sa International Pharmaceutical Inc. (IPI) ug Thai boxing patron Naris Singwangcha, ang stablemate ni Silvano nga si Jason Canoy mi-KO ni Ryan Bongcawil sa 2:59 sa ninth round.
Midaog usab si Jack 'Golden Boy' batok ni JR Salvador, si Jalil Payao mi-TKO ni Rommel Banquirego ug Charlie Pucdol mipaundang ni Jerome Casas.
Nagtabla ang away nilang Jordan Catubay ug Sherwin Caday. (BANAT SPORTS)