Mayol nagtinguha'g 'title fight'

CEBU, Philippines - Kursonada si former WBC light flyweight champion Rodel 'Batang Mandaue' Mayol nga makigsangka sa modaog sa "unification bout" tali ni Fil-American Brian Viloria ug Mexican Hernan Marquez.

Sila si Viloria ug Marquez magsangka alang sa WBO ug WBA flyweight titles sa Septiyembre 29 didto sa Home Depot Center sa Carson, California.

Naglaraw og laing world title shot si Mayol human siya midaog batok ni kanhi Mexican champion Julio Cesar Miranda niadtong Mayo 13.

"Gusto ko og laing world title fight," matud pa sa 30-anyos nga si Mayol. "Andam ko mosukol sa modaog nila ni Viloria ug Marquez."

Apan sa dili pa siya maghuna-huna niini, si Mayol makigsangka una sa Mexican nga si Jose Alfredo Tirado sa Septiyembre 22 didto sa Baguio City.

 "Mga next month magsugod nako og training didto sa Baguio or diri sa Cebu sa Rex 'Wakee' Salud Gym o sa Omega Gym," dugang pa niya.

Si Mayol nagpalandong karon ubos sa promotional banner sa MP Promotions ni ring icon Manny Pacquiao.  (BANAT SPORTS)