El Niño sa Olympic Medal
Sugod na ang 2012 London Olympics kagahapon ug malaumon gihapon ang mga Filipino nga makadala og medalya aron mabugto na kining El Niño sa medalya o gitawag nga "Olympic medal drought" sa Pilipinas.
Sud sa 16 ka tuig o tulo ka Summer Olympics (Athens, Greece; Sydney, Australia ug Beijing, China) walay bisan usa ka medalyang nadala ang atong mga Olympians. Ang katapusan natong medalya sa Olympics naggikan sa boksing pinaagi ni Mansueto 'Onyok' Velasco sa Atlanta, USA Summer Olympics niadtong 1996.
Hinuon, itandi sa silingan natong nasud dinhi sa Southeast Asia, duna na kita'y siyam ka medals, samtang ang mga Burmese (Myanmar) wala sukad nga sila nakaapil sa Olympics niadtong 1948.
Ang Pilipinas mipadala og 11 ka Olympics team sa London sa natad sa cycling, boxing, archery, weightlifting, judo, athletics ug shooting. For the record, ang boksing maoy nag-una natong sport diin duna kita'y daghang Olympic medals nga adunay lima.
Sumala pa sa Wikipedia, kini na maoy kinagamyang delegasyon sa kasaysayan sa Pilipinas sa pag-apil niini sa Olympics sukad 1932. Unang miapil ang Pilipinas sa Olympics niadtong 1924 ug maoy nahimong unang nasud gikan sa Southeast Asia nga mi-compete ug midaog og medalya.
Gawas sa Summer Olympics nakaapil usab sa makatulo ka higayon ang Pilipinas og Winter Olympics ug una gihapon sa tanang nasud sa tropical nga rehiyon sa kalibutan nga miapil og Winter Olympics. Imagine "winter" nag-ice, wala may snow sa ato, apan nakapadala gihapon kita didto og delegado.
Ato lang i-ampo ang atong mga atleta nga makasugakod sila sa katugnaw didto ug unta tabangan nato sila pag-ampo nga modaog og medalya!
* * *
Karon pa ko makalugar ani pagsulat mga Tirador. Duna ko'y namatikdan sa usa nakong pagtan-aw og mixed martial arts competition dili pa lang dugay kun unsa ka daku ang epekto sa duol kaayong suga nga itutok diha sa ring.
Tinuod, contact sport man gyud ang bisan unsang martial arts labi na kun mixed martial arts. Seguradong panington gyud ka og bugbog sa aktuwal na nga kompetisyon. Apan sa akong nabantayan mas grabe pa gyud ang mabating kaigang o kainit sa lawas sa mga fighters kun ang suga duol ra kaayo sa ring. Mura ka niana og nagpa sun-tanning o ang tuyong pagpaitom sa panit nga sagad buhaton sa mga puti.
Usa ka beteranong kickboxer ug mixed martial arts practitioner nga atong higala nga nakasuway na'g kumbati ibabaw sa ring miingon nga pwerteng inita ana diha sa tungod sa suga. Mao diay nga bisan sa round 1 pa lang duna na gyu'y hangakon bisan pa man sa kataas sa ilang pangandam.
* * *
Bahala og uwahi na, congrats diay sa atong kauban dinhi sa Banat News nga si Lemuel P. Maglinte sa pagdaog sa iyang debut sa mixed-martial arts niadtong Hulyo 14. Usa siya sa niaway sa "Ground & Pound VI: Invincible" nga gipasiugdahan sa Yaw-Yan Ardigma ni Master Ekin Caniga Jr.
* * *
PAGTULON-AN: "Kun masugdan nimo nga moatras sa pagsuway, mabatasan na nimo kini hangtud sa hangtud."
- Latest
- Trending
