CEBU, Philippines - Mitabok pa og pito ka lawod ang Pink team una nila matugkad ang kinapusorang kalipay dihang ilang nasakmit ang korona sa Inter-color division sa Phase 3 Camella Homes Sunday Club basketball tournament didto sa Villas Magallanes gym, Lapu-Lapu City.
Ang Pink nakabangon sa final period human malubong og 23 puntos sa halftime aron tipion ang Green team sa iskor nga 92-89.
Pwerteng kayod ni ex-PBA cager Larry Villanil diin iyang gipamatuod ang pagkamaayong basketbolista aron pangulohan ang Pink pinaagi sa iyang 24 puntos. Miabag usab si Clied Malolot, kinsa miariya og 23 puntos, si Centes Brañanola mitimbre og 11 puntos, samtang si Ragaza mitimang og 10 puntos aron tabangon ang Pink pagdaog sa kampiyonato.
Nangulo sa pilderong Green team mao si Rommel Andrino pinaagi sa iyang 18 puntos, gisundan ni Roilan Sumilang nga adunay 16 puntos, si Jimboy Igot miabuno og 11 puntos ug sila si Alan Sepe ug Amay Palad mihirit og 10 puntos matag usa.
Ang Sunday Club cagefest nahimong posible ug nagmalampuson tungod sa walay hunong nga pagbubo og suporta ni businessman Rolly dela Pieza, Roro Transport ug sa JB Sportswear sa magtiayong Billy ug Judith Nadado.
PUNTOS MATAG USA
PINK (92) - Villanil 24, Malolot 23, Brañanola 11, Ragaza 10, Baberona 8, Plenos 6, Amistad 5, Almacen 4, Vega 1
GREEN (89) - Andrino 18, Sumilang 16, Igot 11, Sepe 10, Palad 10, Geraldez 8, Cortes 6, Modena 6, Diongzon 4 (BANAT SPORTS)