CEBU, Philippines - Nagpungasi nga kombinasyon ang gibuhian ni Philippine super flyweight champion Marco Demecillo-Singwangcha sa RWS Stable nga igo na kaayo aron paundangon ang bisitang boksidor nga si Jeffrey Cerna sa seventh round sa main event sa "No Retreat, No Surrender" sa miaging gabii didto sa Compostela.
Unang natumba si Cerna sa sixth round ug gikan didto wala na hunongi sa Sugbuanong boksidor nga si Singwangcha pagrumbo ang taga-Manila nga boksidor.
Sa misunod nga round, nakorner ni Singwangcha si Cerna ug gidabo-dabohan kini pag-ayo. Nahayang pag-usab si Cerna human maigo sa kumo ni Singwangcha ug ning higayona, si referee Teddy Alivio mihunong sa away sa oras nga 1:12 sa seventh round.
Sa maong kadaugan, milambo ang rekord ni Singwangcha ngadto sa 17-0, 13KOs, samtang si Cerna midailos sa 12-6, 5KOs.
Sa supporting main event, gisakmit ni Adones TI Yamataga Aguelo ang interim Phl featherweight belt dihang iyang gipaundang si Jerry Nardo sa sixth round.
Si Eman Labanza midaog pinaagi sa TKO batok ni Redondo Singwangcha sa ninth round aron makuha ang PBF super featherweight title. (BANAT SPORTS)