Title fight ni Banal wala pay binyu

CEBU, Philippines - Wala pa gihapon kasiguro si ALA Promotions CEO Michael Aldeguer kun anhi ba sa Pilipinas ipahigayon ang title fight ni AJ 'Bazooka' Banal batok ni Thai boxer Pungluang Sor Singyu.

Matud pa ni Aldeguer nga padayon gihapon karon ang way puas nilang pakigsabot-sabot tali sa kampo sa Thai ug usa sa ilang gihingusgan mao nga ang Pilipinas maoy mo-host sa away.

Ang WBO rank No. 1 nga si Banal ug rank No. 2 nga si Sor Singyu mag-ilog sa bakanteng WBO bantamweight title nga gibakante ni Mexican Jorge Arce.

Sumala pa ni Aldeguer nga nakasugat sila og problema tungod kay nagmagahi ang sikat ug adunahang female Thai promoter nga si Pariyakorn Ratanasuban. Gusto usab ni Ratanasuban nga sa Thailand himuon ang away.

Ang Banal-Sor Singyu title fight tentatibong gitakda sa Oktubre. (BANAT SPORTS)