CEBU, Philippines - Gipakita sa Sugbuanong si Noy Jopson nga andam na siya sa Ironman Philippines sunod bulan dihang iyang gidominar ang 2nd Mayor Moonyeen Durano Triathlon Cup sa miaging adlaw didto sa Alegre Beach Resort and Spa.
Bisan pa sa presensiya sa laing duha ka dekalibreng runners nga karon triathletes nga sila si Mendel Lopez ug Philip Dueñas, si Jopson nakamaneho gihapon sa pag-angkon sa overall champion sa standard triathlon distance dihang iyang gitapos sa lumba sud sa duha ka oras, 37 minutos ug pito ka segundos.
Si Dueñas, kinsa mioras og 2:42.22 mipahiluna sa ikaduhang dapit, samtang si Lopez nga naplatan mitapos sa oras nga 2.53:08 alang sa ikatulo.
Naghari sab si Jopson sa 30-39 class batok nilang Randy Gilles ug Dale Alicaba nga mi-okupar sa ikaduha ug ikatulo nga dapit.
Sa ilang bahin, sila si Dueñas ug Lopez mi-okupar sa una ug ikaduha nga dapit sa 25-29 division, samtang si Daryl Jay Caballes mitapos sa ikatulo.
Lain pang naghari sa tagsa-tagsa ka dibisyon mao sila si Rodem Paras (15-20 class), Jason Bilangdal (20-24 class), Hector Restauro (30-34 class), Alvin Abarquez (40-44 class), John Go (46-49 class) ug Gianluca Guidicelli (50-54 class). (BANAT SPORTS)