Yamit ug Noblefranca mipukan sa mga kontra

CEBU, Philippines - Mipatigbabaw ang kusug sa pambato sa Butuan Extreme MMA nga si Lordy Rey ‘Punisher’ Yamit dihang iyang gipaundang sa third round si Mark "Terminator" Araneta sa Unified MMA sa Mandaue City sa main event sa "Ground and Pound VI: Invincible" diha sa New Cebu Coliseum.

Ang 34-anyos Mixed Martial Arts (MMA) veteran nga si Yamit misakmit sa bakanteng GNP lightweight title sa fight card nga gipasiugdahan sa Yaw-Yan ArDigma Martial Arts Federation Inc. sa pagpangulo ni CEO/ Founder Master Benigno ‘Ekin’ R. Caniga Jr.

Way atrasay ug naghinilam-osay og kumo ang duha ka mga fighters sud sa duha ka round, apan nahubsan sa hangin ang taga-Mandaue City nga si Araneta rasun nga gisinyas sa korner niini nga undangon na ang away sa dayun untang bagting sa pagsugod third round.

Sa supporting main event, gilatos ni Renan ‘Limbas’ Noblefranca ang karibal nga si Steve ‘Lightning’ Sevilleno sa Mindanao Unified MMA. Wa kaporma si Sevilleno sa mga atake ni Noblefranca kinsa miangkon sa YFCC bantamweight belt.

Gawas ni Noblefranca, nangharus usab ang laing lima ka miyembro sa Yaw-Yan Ardigma Cebu Top Team nga sila si Kyle "Hurricane" Co, Keith "Ice" Acapulco, Roel "Akiyama" Rosauro, Lemuel "Musang" Maglinte ug Briton nga si Cris Thompson "Lindol" Brooks.

Si Co mimakmak ni Jonamar "Naruto" Macaraya, si Acapulco mituok ni Ryan ‘Assassin’ Salomon, gibukbuk ni Rosauro si Israel Gomez, gipaundang ni Maglinte si Zoren Pescador, samtang midaog pinaagi sa default si Brooks dihang miatras ang Boholano nga si Jerry Sabayan. - BANAT NEWS