Dolphins kampeon sa BP Series 9

MANILA, Philippines - Inilabas ni Christian Mag­hanoy ang angking hu­say sa pagpukol habang humataw uli sina Joseph Orillana at Lorenzo Ubu­ngen sa pagpalo upang katampukan ang pamama­yagpag uli ng Cebu Dolphins sa Manila Sharks, 6-1, sa Game Two ng Baseball Philippines Series 9 Finals kahapon sa Rizal Memorial Diamond.

Nilimitahan lamang ng bihirang gamitin na si Maghanoy ang mga ma­mamalo ng Sharks sa pitong hits at isang run sa pitong innings para pangunahan ang 2-0 sweep sa best of three series.

May 10 hits na ginawa ang Dolphins laban sa da­­lawang pitchers at si Joseph Orillana ay naka-homerun sa fourth inning para ibigay ang 2-1 kalamangan bago si Ubungen ay humataw ng run-single upang pag-initin ang dalawang runs na kinamada ng koponan sa seventh para angkinin ang panalo sa 4-1 bentahe.

Ang Fil-Am na si Ubu­ngen ang siyang hinirang bilang Finals MVP matapos maghatid ng kabuuang limang RBIs. Apat dito ay ginawa niya sa kinuhang 8-6 panalo sa Game One noong Sabado.

Ibinulsa naman ng Du­maguete Unibikers ang ikatlong puwesto sa 6-4 panalo sa Alabang Tigers na siyang unang laro.