Aduna gyu'y malup-og

CEBU, Philippines - Mao pa gani ang unang panagkita nila ni Mark 'The Terminator' Araneta ug Lorde Rey 'Punisher' Yamit, nagbinaharay na dayon ang duha ka protagonista nga maoy magsangka sa main event sa "Ground and Pound VI: Invincible" ugma sa gabii diha sa Cebu Coliseum.

Ang pambato sa Unified Mandaue Mixed Martial Arts (UMMA) nga si Araneta ug   Yamit sa Butuan Extreme MMA sa Butuan City magsangka sa GNP lightweight championship.

Si Yamit maoy unang misaad og "knockout" ug gipadayag ang hugot niyang tinguha nga makuha ang bakanteng bakus.

"Expect na lang mo og war ibabaw sa ring, dili ni abtan og five rounds among away, naa gyu'y matumba," sumala pa ni Yamit.

Hinuon, si Araneta, kinsa daku usab og pagsalig sa iyang abilidad uban ang walay puas nga pagpangandam, naglaraw usab nga mohimo og "knockout" nga kadaugan.

"Nangandam gyud ko aning duwaa, gusto gyud nako makuha ang bakus, andam ko mohimo og knockout," matud pa niya.

Ang duha ka fighters pulos nabantog nga knockout artists. Si Araneta adunay rekord nga 5-2 win-loss record diin tanan niyang daog niini gikan sa knockout, samtang si Yamit nagbitbit og 7-3, 5KOs record.

Sa supporting main event, magsangka sila si Renan 'Limbas' Noblefranca sa Yaw-Yan ArDigma Cebu Top Team ug Steve "D' Lightning" Sevilleno sa Team MUMMA-Manila alang sa YFCC bantamweight belt.

Angay usab nga atngan ang makasaysayanong gubat nga uloha'g "Founder vs. Founder" tali nila ni Allan 'The Dancing Man' Epile sa Soma KBC ug Ben 'Durex Warrior' Torbiso sa Durex Dragon KBC.

Gawas ni Noblefranca, laing upat ka miyembro sa Yaw-Yan ArDigma Cebu Top Team ang mopakita sab sa ilang katakus.

Sila mao si Keith 'Ice' Acapulco, Roel 'Akiyama' Rosauro, Lemuel 'Musang' Maglinte ug British Cris Thompson 'Lindol' Brooks.

Si Acapulco mosukod sa abilidad ni Ryan Salomon, si Rosauro makigharong ni Israel Gomez,   si Maglinte makigsangka ni Zoren Pescador ug si Brooks makigbinukbukay ni Jerry Sabayan.

Ang mga tiket nagkantidad og P150 sa upper box, P300 sa lower box, P500 sa ringside ug P1,000 sa VIP section.    (BANAT SPORTS)