Andam na ang Sogod Triathlon

CEBU, Philippines - Plansado na ang tanan alang sa 2nd Sogod Mayor Moonyeen Durano Triathlon Cup nga mosikad ugma didto sa Alegre Beach Resort and Spa sa lungsod sa Bogo, amihanang bahin sa lalawigan sa Sugbu.

Sugdan ang lumba pinaagi sa SuperTriKids sa alas-2 sa hapon didto sa Aqua-Sports Facility sa nahisgutang resort.

Sa laing bahin, ang standard triathlon distance sugdan sa alas-3 sa hapon, sundan sa half-distance ug relay competition sa alas-3:15 sa hapon.

Ang duathlon ug half-duathlon gitakda sa alas-3:45 sa hapon ug dayon ang awarding ug dinner party sa alas-6 sa gabii didto sa Crescent Cove.

Niadtong wala pa makaparehistro, mahimong magpalista sa Runnr ug sa Rudy Project sa Ayala Center-Cebu ug sa Brick Tri Shop sa J Centre Mall.

Ang registration fee nagkantidad og P1,000, samtang ang on-site registrants pabayron og P1,200.

Ang organizers mohatag og libreng transportasyon sa mga partisipante. Adto kini mag-abot sa parking lot sa SM City-Cebu sa alas-8 sa buntag. Ihatod sab balik sa siyudad sa Sugbu ang partisipante sa alas-9 sa gabii. (BANAT SPORTS)