Donaire-Arce sa Oktubre

MANILA, Philippines - Matapos talunin ang mga ayaw makipagsaba­yang sina Omar Narvaez, Wil­fredo Vazquez, Jr. at Jef­frey Mathebula, isang Me­xican warrior naman ang inaasahang magbibigay ng mabigat na laban kay unified world super ban­tamweight champion No­nito ‘The Filipino Flash’ Do­naire, Jr.

Sinabi ni Bob Arum ng Top Rank Promotions na iti­nakda na niya ang banggaan nina Donaire at Jorge Arce ng Mexico sa Oktubre sa Staples Center sa Los Angeles, California.

“There is still no exact date but it’ll be in October,” wi­ka ni Arum sa pagtatakda niya ng suntukan nina Do­naire at Arce.

Tinalo ni Donaire si Nar­va­ez via unanimous decision, habang binigo niya si Vazquez sa pamamagitan ng split decision at hinubaran ng korona si Mathebula mula sa isang unanimous decision win.

Kasabay ng kanyang matagumpay na pagdedepensa sa kanyang hawak na World Boxing Organization (WBO), inagaw ni Do­naire kay Mathebula ang bit­bit nitong International Bo­­xing Federation (IBF) belt noong Linggo sa Home Depot Center sa Carson, California.

Tangan ngayon ng 29-anyos na si Donaire ang kan­yang 29-1-0 win-loss-draw ring record kasama ang 18 KOs, habang hawak naman ng 32-anyos na si Arce ang 60-6-2 (46 KOs) card.

Si Arce, nagkampeon na sa light flyweight, super flyweight, bantamweight at su­per bantamweight divisions kagaya ni Donaire, ay kilalang hindi umaatras sa anumang laban.

“It’s Arce either in October or November. We are com­mitted to fight Arce, we ha­ve an agreement, verbal ag­reement, to fight Arce,” ani Cameron Dunkin, ang ma­nager ni Donaire.

Ikinunsi­dera rin ni Arum para makalaban ni Donaire sina Toshiaki Nishioka ng Japan at Guil­lermo Rigondeaux ng Cu­ba.

Si Rigondeaux ang World Boxing Association (WBA) ruler at mga da­ting kam­peon naman sina Ar­ce at Nishioka.

Napilitang isuko ni Ni­shi­oka (39-4-3, 24 KOs) ang kan­yang WBC title nang hin­di siya ma­kalaban sa lo­ob ng isang taon.

Nasa listahan naman ni Donaire si Abner Ma­res (24-0-1, 13 KOs) ng Me­xico na siyang World Bo­xing Council (WBC) su­per ban­tam­weight titlist.